Allepo, Job, Chapter 16

Job 16:1 א                  ויען איוב ויאמר
Job 16:2 ב  שמעתי כאלה רבות    מנחמי עמל כלכם
Job 16:3 ג  הקץ לדברי-רוח    או מה-ימריצך כי תענה
Job 16:4 ד  גם אנכי--    ככם אדברה לו יש נפשכם תחת נפשי--    אחבירה עליכם במלים ואניעה עליכם    במו ראשי
Job 16:5 ה  אאמצכם במו-פי    וניד שפתי יחשך
Job 16:6 ו  אם-אדברה לא-יחשך כאבי    ואחדלה מה-מני יהלך
Job 16:7 ז  אך-עתה הלאני    השמות כל-עדתי
Job 16:8 ח  ותקמטני לעד היה    ויקם בי כחשי בפני יענה
Job 16:9 ט  אפו טרף וישטמני--חרק עלי בשניו    צרי ילטש עיניו לי
Job 16:10 י  פערו עלי בפיהם--בחרפה הכו לחיי    יחד עלי יתמלאון
Job 16:11 יא  יסגירני אל אל עויל    ועל-ידי רשעים ירטני
Job 16:12 יב  שלו הייתי ויפרפרני--    ואחז בערפי ויפצפצני ויקימני לו    למטרה
Job 16:13 יג  יסבו עלי רביו--    יפלח כליותי ולא יחמל ישפך לארץ    מררתי
Job 16:14 יד  יפרצני פרץ על-פני-פרץ    ירץ עלי כגבור
Job 16:15 טו  שק תפרתי עלי גלדי    ועללתי בעפר קרני
Job 16:16 טז  פני חמרמרה (חמרמרו) מני-בכי    ועל עפעפי צלמות
Job 16:17 יז  על לא-חמס בכפי    ותפלתי זכה
Job 16:18 יח  ארץ אל-תכסי דמי    ואל-יהי מקום לזעקתי
Job 16:19 יט  גם-עתה הנה-בשמים עדי    ושהדי במרמים
Job 16:20 כ  מליצי רעי    אל-אלוה דלפה עיני
Job 16:21 כא  ויוכח לגבר עם-אלוה    ובן-אדם לרעהו
Job 16:22 כב  כי-שנות מספר יאתיו    וארח לא-אשוב אהלך