Allepo, Job, Chapter 14

Job 14:1 א  אדם ילוד אשה--    קצר ימים ושבע-רגז
Job 14:2 ב  כציץ יצא וימל    ויברח כצל ולא יעמוד
Job 14:3 ג  אף-על-זה פקחת עינך    ואתי תביא במשפט עמך
Job 14:4 ד  מי-יתן טהור מטמא--    לא אחד
Job 14:5 ה  אם חרוצים ימיו--מספר-חדשיו אתך    חקו עשית ולא יעבר
Job 14:6 ו  שעה מעליו ויחדל--    עד-ירצה כשכיר יומו
Job 14:7 ז  כי יש לעץ    תקוה אם-יכרת ועוד יחליף    וינקתו לא תחדל
Job 14:8 ח  אם-יזקין בארץ שרשו    ובעפר ימות גזעו
Job 14:9 ט  מריח מים יפרח    ועשה קציר כמו-נטע
Job 14:10 י  וגבר ימות ויחלש    ויגוע אדם ואיו
Job 14:11 יא  אזלו-מים מני-ים    ונהר יחרב ויבש
Job 14:12 יב  ואיש שכב    ולא-יקום עד-בלתי שמים לא יקיצו    ולא-יערו משנתם
Job 14:13 יג  מי יתן בשאול תצפנני--    תסתירני עד-שוב אפך תשית לי חק    ותזכרני
Job 14:14 יד  אם-ימות גבר    היחיה כל-ימי צבאי איחל--    עד-בוא חליפתי
Job 14:15 טו  תקרא ואנכי אענך    למעשה ידיך תכסף
Job 14:16 טז  כי-עתה צעדי תספור    לא-תשמר על-חטאתי
Job 14:17 יז  חתם בצרור פשעי    ותטפל על-עוני
Job 14:18 יח  ואולם הר-נופל יבול    וצור יעתק ממקמו
Job 14:19 יט  אבנים שחקו מים--    תשטף-ספיחיה עפר-ארץ ותקות אנוש    האבדת
Job 14:20 כ  תתקפהו לנצח ויהלך    משנה פניו ותשלחהו
Job 14:21 כא  יכבדו בניו ולא ידע    ויצערו ולא-יבין למו
Job 14:22 כב  אך-בשרו עליו יכאב    ונפשו עליו תאבל