Allepo, Job, Chapter 13

Job 13:1 א  הן-כל ראתה עיני    שמעה אזני ותבן לה
Job 13:2 ב  כדעתכם ידעתי גם-אני    לא-נפל אנכי מכם
Job 13:3 ג  אולם--אני אל-שדי אדבר    והוכח אל-אל אחפץ
Job 13:4 ד  ואולם אתם טפלי-שקר    רפאי אלל כלכם
Job 13:5 ה  מי-יתן החרש תחרישון    ותהי לכם לחכמה
Job 13:6 ו  שמעו-נא תוכחתי    ורבות שפתי הקשיבו
Job 13:7 ז  הלאל תדברו עולה    ולו תדברו רמיה
Job 13:8 ח  הפניו תשאון    אם-לאל תריבון
Job 13:9 ט  הטוב כי-יחקר אתכם    אם-כהתל באנוש תהתלו בו
Job 13:10 י  הוכח יוכיח אתכם--    אם-בסתר פנים תשאון
Job 13:11 יא  הלא שאתו תבעת אתכם    ופחדו יפל עליכם
Job 13:12 יב  זכרניכם משלי-אפר    לגבי-חמר גביכם
Job 13:13 יג  החרישו ממני ואדברה-אני    ויעבר עלי מה
Job 13:14 יד  על-מה אשא בשרי בשני    ונפשי אשים בכפי
Job 13:15 טו  הן יקטלני לא (לו) איחל    אך-דרכי אל-פניו אוכיח
Job 13:16 טז  גם-הוא-לי לישועה    כי-לא לפניו חנף יבוא
Job 13:17 יז  שמעו שמוע מלתי    ואחותי באזניכם
Job 13:18 יח  הנה-נא ערכתי משפט    ידעתי כי-אני אצדק
Job 13:19 יט  מי-הוא יריב עמדי    כי-עתה אחריש ואגוע
Job 13:20 כ  אך-שתים אל-תעש עמדי    אז מפניך לא אסתר
Job 13:21 כא  כפך מעלי הרחק    ואמתך אל-תבעתני
Job 13:22 כב  וקרא ואנכי אענה    או-אדבר והשיבני
Job 13:23 כג  כמה לי עונות וחטאות--    פשעי וחטאתי הדיעני
Job 13:24 כד  למה-פניך תסתיר    ותחשבני לאויב לך
Job 13:25 כה  העלה נדף תערוץ    ואת-קש יבש תרדף
Job 13:26 כו  כי-תכתב עלי מררות    ותורישני עונות נעורי
Job 13:27 כז  ותשם בסד רגלי--    ותשמור כל-ארחתי על-שרשי רגלי    תתחקה
Job 13:28 כח  והוא כרקב יבלה    כבגד אכלו עש