Job 12:1 א                  ויען איוב ויאמר
Job 12:2 ב  אמנם כי אתם-עם    ועמכם תמות חכמה
Job 12:3 ג  גם-לי לבב כמוכם--לא-נפל אנכי מכם    ואת-מי-אין כמו-אלה
Job 12:4 ד  שחק לרעהו אהיה--קרא לאלוה ויענהו    שחוק צדיק תמים
Job 12:5 ה  לפיד בוז לעשתות שאנן--    נכון למועדי רגל
Job 12:6 ו  ישליו אהלים לשדדים ובטחות למרגיזי אל--    לאשר הביא אלוה בידו
Job 12:7 ז  ואולם--שאל-נא בהמות ותרך    ועוף השמים ויגד-לך
Job 12:8 ח  או שיח לארץ ותרך    ויספרו לך דגי הים
Job 12:9 ט  מי לא-ידע בכל-אלה    כי יד-יהוה עשתה זאת
Job 12:10 י  אשר בידו נפש כל-חי    ורוח כל-בשר-איש
Job 12:11 יא  הלא-אזן מלין תבחן    וחך אכל יטעם-לו
Job 12:12 יב  בישישים חכמה    וארך ימים תבונה
Job 12:13 יג  עמו חכמה וגבורה    לו עצה ותבונה
Job 12:14 יד  הן יהרוס ולא יבנה    יסגר על-איש ולא יפתח
Job 12:15 טו  הן יעצר במים ויבשו    וישלחם ויהפכו ארץ
Job 12:16 טז  עמו עז ותושיה    לו שגג ומשגה
Job 12:17 יז  מוליך יועצים שולל    ושפטים יהולל
Job 12:18 יח  מוסר מלכים פתח    ויאסר אזור במתניהם
Job 12:19 יט  מוליך כהנים שולל    ואתנים יסלף
Job 12:20 כ  מסיר שפה לנאמנים    וטעם זקנים יקח
Job 12:21 כא  שופך בוז על-נדיבים    ומזיח אפיקים רפה
Job 12:22 כב  מגלה עמקות מני-חשך    ויצא לאור צלמות
Job 12:23 כג  משגיא לגוים ויאבדם    שטח לגוים וינחם
Job 12:24 כד  מסיר--לב ראשי עם-הארץ    ויתעם בתהו לא-דרך
Job 12:25 כה  ימששו-חשך ולא-אור    ויתעם כשכור