Allepo, Job, Chapter 11

Job 11:1 א                  ויען צפר הנעמתי ויאמר
Job 11:2 ב  הרב דברים לא יענה    ואם-איש שפתים יצדק
Job 11:3 ג  בדיך מתים יחרישו    ותלעג ואין מכלם
Job 11:4 ד  ותאמר זך לקחי    ובר הייתי בעיניך
Job 11:5 ה  ואולם--מי יתן אלוה דבר    ויפתח שפתיו עמך
Job 11:6 ו  ויגד-לך תעלמות חכמה--    כי-כפלים לתושיה ודע--    כי-ישה לך אלוה מעונך
Job 11:7 ז  החקר אלוה תמצא    אם עד-תכלית שדי תמצא
Job 11:8 ח  גבהי שמים מה-תפעל    עמקה משאול מה-תדע
Job 11:9 ט  ארכה מארץ מדה    ורחבה מני-ים
Job 11:10 י  אם-יחלף ויסגיר    ויקהיל ומי ישיבנו
Job 11:11 יא  כי-הוא ידע מתי-שוא    וירא-און ולא יתבונן
Job 11:12 יב  ואיש נבוב ילבב    ועיר פרא אדם יולד
Job 11:13 יג  אם-אתה הכינות לבך    ופרשת אליו כפיך
Job 11:14 יד  אם-און בידך הרחיקהו    ואל-תשכן באהליך עולה
Job 11:15 טו  כי-אז תשא פניך ממום    והיית מצק ולא תירא
Job 11:16 טז  כי-אתה עמל תשכח    כמים עברו תזכר
Job 11:17 יז  ומצהרים יקום חלד    תעפה כבקר תהיה
Job 11:18 יח  ובטחת כי-יש תקוה    וחפרת לבטח תשכב
Job 11:19 יט  ורבצת ואין מחריד    וחלו פניך רבים
Job 11:20 כ  ועיני רשעים תכלינה    ומנוס אבד מנהם ותקותם מפח-נפש