Allepo, Job, Chapter 10

Job 10:1 א  נקטה נפשי בחיי    אעזבה עלי שיחי אדברה במר נפשי
Job 10:2 ב  אמר אל-אלוה אל-תרשיעני    הודיעני על מה-תריבני
Job 10:3 ג  הטוב לך כי תעשק--כי-תמאס יגיע כפיך    ועל-עצת רשעים הופעת
Job 10:4 ד  העיני בשר לך    אם-כראות אנוש תראה
Job 10:5 ה  הכימי אנוש ימיך    אם-שנותיך כימי גבר
Job 10:6 ו  כי-תבקש לעוני    ולחטאתי תדרוש
Job 10:7 ז  על-דעתך כי-לא ארשע    ואין מידך מציל
Job 10:8 ח  ידיך עצבוני ויעשוני    יחד סביב ותבלעני
Job 10:9 ט  זכר-נא כי-כחמר עשיתני    ואל-עפר תשיבני
Job 10:10 י  הלא כחלב תתיכני    וכגבנה תקפיאני
Job 10:11 יא  עור ובשר תלבישני    ובעצמות וגידים תשככני
Job 10:12 יב  חיים וחסד עשית עמדי    ופקדתך שמרה רוחי
Job 10:13 יג  ואלה צפנת בלבבך    ידעתי כי-זאת עמך
Job 10:14 יד  אם-חטאתי ושמרתני    ומעוני לא תנקני
Job 10:15 טו  אם רשעתי אללי לי--    וצדקתי לא-אשא ראשי שבע קלון    וראה עניי
Job 10:16 טז  ויגאה כשחל תצודני    ותשב תתפלא-בי
Job 10:17 יז  תחדש עדיך נגדי ותרב כעשך עמדי    חליפות וצבא עמי
Job 10:18 יח  ולמה מרחם הצאתני    אגוע ועין לא-תראני
Job 10:19 יט  כאשר לא-הייתי אהיה    מבטן לקבר אובל
Job 10:20 כ  הלא-מעט ימי יחדל (וחדל)    ישית (ושית) ממני ואבליגה מעט
Job 10:21 כא  בטרם אלך ולא אשוב--    אל-ארץ חשך וצלמות
Job 10:22 כב  ארץ עפתה כמו אפל--צלמות ולא סדרים    ותפע כמו-אפל