Allepo, Job, Chapter 09

Job 9:1 א                  ויען איוב ויאמר
Job 9:2 ב  אמנם ידעתי כי-כן    ומה-יצדק אנוש עם-אל
Job 9:3 ג  אם-יחפץ לריב עמו--    לא-יעננו אחת מני-אלף
Job 9:4 ד  חכם לבב ואמיץ כח--    מי-הקשה אליו וישלם
Job 9:5 ה  המעתיק הרים ולא ידעו--    אשר הפכם באפו
Job 9:6 ו  המרגיז ארץ ממקומה    ועמודיה יתפלצון
Job 9:7 ז  האמר לחרס ולא יזרח    ובעד כוכבים יחתם
Job 9:8 ח  נטה שמים לבדו    ודורך על-במתי ים
Job 9:9 ט  עשה-עש כסיל וכימה    וחדרי תמן
Job 9:10 י  עשה גדלות עד-אין חקר    ונפלאות עד-אין מספר
Job 9:11 יא  הן יעבר עלי ולא אראה    ויחלף ולא-אבין לו
Job 9:12 יב  הן יחתף מי ישיבנו    מי-יאמר אליו מה-תעשה
Job 9:13 יג  אלוה לא-ישיב אפו    תחתו שחחו עזרי רהב
Job 9:14 יד  אף כי-אנכי אעננו    אבחרה דברי עמו
Job 9:15 טו  אשר אם-צדקתי לא אענה    למשפטי אתחנן
Job 9:16 טז  אם-קראתי ויענני--    לא-אאמין כי-יאזין קולי
Job 9:17 יז  אשר-בשערה ישופני    והרבה פצעי חנם
Job 9:18 יח  לא-יתנני השב רוחי    כי ישבעני ממררים
Job 9:19 יט  אם-לכח אמיץ הנה    ואם-למשפט מי יועידני
Job 9:20 כ  אם-אצדק פי ירשיעני    תם-אני ויעקשני
Job 9:21 כא  תם-אני לא-אדע נפשי    אמאס חיי
Job 9:22 כב  אחת היא    על-כן אמרתי--תם ורשע הוא מכלה
Job 9:23 כג  אם-שוט ימית פתאם--    למסת נקים ילעג
Job 9:24 כד  ארץ נתנה ביד-רשע--    פני-שפטיה יכסה אם-לא אפוא    מי-הוא
Job 9:25 כה  וימי קלו מני-רץ    ברחו לא-ראו טובה
Job 9:26 כו  חלפו עם-אניות אבה    כנשר יטוש עלי-אכל
Job 9:27 כז  אם-אמרי אשכחה שיחי    אעזבה פני ואבליגה
Job 9:28 כח  יגרתי כל-עצבתי    ידעתי כי-לא תנקני
Job 9:29 כט  אנכי ארשע    למה-זה הבל איגע
Job 9:30 ל  אם-התרחצתי במו- (במי-) שלג    והזכותי בבר כפי
Job 9:31 לא  אז בשחת תטבלני    ותעבוני שלמותי
Job 9:32 לב  כי-לא-איש כמוני אעננו    נבוא יחדו במשפט
Job 9:33 לג  לא יש-בינינו מוכיח--    ישת ידו על-שנינו
Job 9:34 לד  יסר מעלי שבטו    ואמתו אל-תבעתני
Job 9:35 לה  אדברה ולא איראנו    כי לא-כן אנכי עמדי