Allepo, Job, Chapter 07

Job 7:1 א  הלא-צבא לאנוש על- (עלי-) ארץ    וכימי שכיר ימיו
Job 7:2 ב  כעבד ישאף-צל    וכשכיר יקוה פעלו
Job 7:3 ג  כן הנחלתי לי ירחי-שוא    ולילות עמל מנו-לי
Job 7:4 ד  אם-שכבתי--    ואמרתי מתי אקום ומדד-ערב ושבעתי נדדים    עדי-נשף
Job 7:5 ה  לבש בשרי רמה וגיש (וגוש) עפר    עורי רגע וימאס
Job 7:6 ו  ימי קלו מני-ארג    ויכלו באפס תקוה
Job 7:7 ז  זכר כי-רוח חיי    לא-תשוב עיני לראות טוב
Job 7:8 ח  לא-תשורני עין ראי    עיניך בי ואינני
Job 7:9 ט  כלה ענן וילך    כן יורד שאול לא יעלה
Job 7:10 י  לא-ישוב עוד לביתו    ולא-יכירנו עוד מקמו
Job 7:11 יא  גם-אני    לא אחשך-פי אדברה בצר רוחי    אשיחה במר נפשי
Job 7:12 יב  הים-אני אם-תנין    כי-תשים עלי משמר
Job 7:13 יג  כי-אמרתי תנחמני ערשי    ישא בשיחי משכבי
Job 7:14 יד  וחתתני בחלמות    ומחזינות תבעתני
Job 7:15 טו  ותבחר מחנק נפשי    מות מעצמותי
Job 7:16 טז  מאסתי לא-לעלם אחיה    חדל ממני כי-הבל ימי
Job 7:17 יז  מה-אנוש כי תגדלנו    וכי-תשית אליו לבך
Job 7:18 יח  ותפקדנו לבקרים    לרגעים תבחננו
Job 7:19 יט  כמה לא-תשעה ממני    לא-תרפני עד-בלעי רקי
Job 7:20 כ  חטאתי מה אפעל לך--    נצר האדם למה שמתני למפגע לך    ואהיה עלי למשא
Job 7:21 כא  ומה לא-תשא פשעי--    ותעביר את-עוני כי-עתה לעפר אשכב    ושחרתני ואינני