Allepo, Job, Chapter 05

Job 5:1 א  קרא-נא היש עונך    ואל-מי מקדשים תפנה
Job 5:2 ב  כי-לאויל יהרג-כעש    ופתה תמית קנאה
Job 5:3 ג  אני-ראיתי אויל משריש    ואקוב נוהו פתאם
Job 5:4 ד  ירחקו בניו מישע    וידכאו בשער ואין מציל
Job 5:5 ה  אשר קצירו רעב יאכל--ואל-מצנים יקחהו    ושאף צמים חילם
Job 5:6 ו  כי לא-יצא מעפר און    ומאדמה לא-יצמח עמל
Job 5:7 ז  כי-אדם לעמל יולד    ובני-רשף יגביהו עוף
Job 5:8 ח  אולם--אני אדרש אל-אל    ואל-אלהים אשים דברתי
Job 5:9 ט  עשה גדלות ואין חקר    נפלאות עד-אין מספר
Job 5:10 י  הנתן מטר על-פני-ארץ    ושלח מים על-פני חוצות
Job 5:11 יא  לשום שפלים למרום    וקדרים שגבו ישע
Job 5:12 יב  מפר מחשבות ערומים    ולא-תעשנה ידיהם תשיה
Job 5:13 יג  לכד חכמים בערמם    ועצת נפתלים נמהרה
Job 5:14 יד  יומם יפגשו-חשך    וכלילה ימששו בצהרים
Job 5:15 טו  וישע מחרב מפיהם    ומיד חזק אביון
Job 5:16 טז  ותהי לדל תקוה    ועלתה קפצה פיה
Job 5:17 יז  הנה אשרי אנוש יוכחנו אלוה    ומוסר שדי אל-תמאס
Job 5:18 יח  כי הוא יכאיב ויחבש    ימחץ וידו תרפינה
Job 5:19 יט  בשש צרות יצילך    ובשבע לא-יגע בך רע
Job 5:20 כ  ברעב פדך ממות    ובמלחמה מידי חרב
Job 5:21 כא  בשוט לשון תחבא    ולא-תירא משד כי יבוא
Job 5:22 כב  לשד ולכפן תשחק    ומחית הארץ אל-תירא
Job 5:23 כג  כי עם-אבני השדה בריתך    וחית השדה השלמה-לך
Job 5:24 כד  וידעת כי-שלום אהלך    ופקדת נוך ולא תחטא
Job 5:25 כה  וידעת כי-רב זרעך    וצאצאיך כעשב הארץ
Job 5:26 כו  תבוא בכלח אלי-קבר    כעלות גדיש בעתו
Job 5:27 כז  הנה-זאת חקרנוה כן-היא    שמענה ואתה דע-לך