Job 4:1 א                  ויען אליפז התימני ויאמר
Job 4:2 ב  הנסה דבר אליך תלאה    ועצר במלין מי יוכל
Job 4:3 ג  הנה יסרת רבים    וידים רפות תחזק
Job 4:4 ד  כושל יקימון מליך    וברכים כרעות תאמץ
Job 4:5 ה  כי עתה תבוא אליך ותלא    תגע עדיך ותבהל
Job 4:6 ו  הלא יראתך כסלתך    תקותך ותם דרכיך
Job 4:7 ז  זכר-נא--מי הוא נקי אבד    ואיפה ישרים נכחדו
Job 4:8 ח  כאשר ראיתי חרשי און    וזרעי עמל יקצרהו
Job 4:9 ט  מנשמת אלוה יאבדו    ומרוח אפו יכלו
Job 4:10 י  שאגת אריה וקול שחל    ושני כפירים נתעו
Job 4:11 יא  ליש אבד מבלי-טרף    ובני לביא יתפרדו
Job 4:12 יב  ואלי דבר יגנב    ותקח אזני שמץ מנהו
Job 4:13 יג  בשעפים מחזינות לילה    בנפל תרדמה על-אנשים
Job 4:14 יד  פחד קראני ורעדה    ורב עצמותי הפחיד
Job 4:15 טו  ורוח על-פני יחלף    תסמר שערת בשרי
Job 4:16 טז  יעמד ולא אכיר מראהו--    תמונה לנגד עיני דממה וקול    אשמע
Job 4:17 יז  האנוש מאלוה יצדק    אם מעשהו יטהר-גבר
Job 4:18 יח  הן בעבדיו לא יאמין    ובמלאכיו ישים תהלה
Job 4:19 יט  אף שכני בתי-חמר--אשר-בעפר יסודם    ידכאום לפני-עש
Job 4:20 כ  מבקר לערב יכתו    מבלי משים לנצח יאבדו
Job 4:21 כא  הלא-נסע יתרם בם    ימותו ולא בחכמה