Allepo, 2 Chronicles, Chapter 15

2Ch 15:1 א ועזריהו בן עודד היתה עליו רוח אלהים
2Ch 15:2 ב ויצא לפני אסא ויאמר לו שמעוני אסא וכל יהודה ובנימן  יהוה עמכם בהיותכם עמו ואם תדרשהו ימצא לכם ואם תעזבהו יעזב אתכם  {ס}
2Ch 15:3 ג וימים רבים לישראל  ללא אלהי אמת וללא כהן מורה--וללא תורה
2Ch 15:4 ד וישב בצר לו על יהוה אלהי ישראל ויבקשהו וימצא להם
2Ch 15:5 ה ובעתים ההם אין שלום ליוצא ולבא  כי מהומת רבות על כל ישבי הארצות
2Ch 15:6 ו וכתתו גוי בגוי ועיר בעיר  כי אלהים הממם בכל צרה
2Ch 15:7 ז ואתם חזקו ואל ירפו ידיכם  כי יש שכר לפעלתכם  {ס}
2Ch 15:8 ח וכשמע אסא הדברים האלה והנבואה עדד הנביא התחזק ויעבר השקוצים מכל ארץ יהודה ובנימן ומן הערים אשר לכד מהר אפרים ויחדש את מזבח יהוה אשר לפני אולם יהוה
2Ch 15:9 ט ויקבץ את כל יהודה ובנימן והגרים עמהם מאפרים ומנשה ומשמעון  כי נפלו עליו מישראל לרב בראתם כי יהוה אלהיו עמו  {פ}
2Ch 15:10 י ויקבצו ירושלם בחדש השלשי לשנת חמש עשרה למלכות אסא
2Ch 15:11 יא ויזבחו ליהוה ביום ההוא מן השלל הביאו  בקר שבע מאות וצאן שבעת אלפים
2Ch 15:12 יב ויבאו בברית--לדרוש את יהוה אלהי אבותיהם  בכל לבבם ובכל נפשם
2Ch 15:13 יג וכל אשר לא ידרש ליהוה אלהי ישראל יומת--למן קטן ועד גדול למאיש ועד אשה
2Ch 15:14 יד וישבעו ליהוה בקול גדול ובתרועה--ובחצצרות ובשופרות
2Ch 15:15 טו וישמחו כל יהודה על השבועה כי בכל לבבם נשבעו ובכל רצונם בקשהו וימצא להם וינח יהוה להם מסביב
2Ch 15:16 טז וגם מעכה אם אסא המלך הסירה מגבירה אשר עשתה לאשרה מפלצת ויכרת אסא את מפלצתה וידק וישרף בנחל קדרון
2Ch 15:17 יז והבמות--לא סרו מישראל  רק לבב אסא היה שלם כל ימיו
2Ch 15:18 יח ויבא את קדשי אביו וקדשיו--בית האלהים  כסף וזהב וכלים
2Ch 15:19 יט ומלחמה לא היתה עד שנת שלשים וחמש למלכות אסא  {פ}