Allepo, 2 Chronicles, Chapter 11

2Ch 11:1 א ויבא רחבעם ירושלם ויקהל את בית יהודה ובנימן מאה ושמונים אלף בחור עשה מלחמה--להלחם עם ישראל להשיב את הממלכה לרחבעם  {פ}
2Ch 11:2 ב ויהי דבר יהוה אל שמעיהו איש האלהים לאמר
2Ch 11:3 ג אמר אל רחבעם בן שלמה מלך יהודה--ואל כל ישראל ביהודה ובנימן לאמר
2Ch 11:4 ד כה אמר יהוה לא תעלו ולא תלחמו עם אחיכם שובו איש לביתו--כי מאתי נהיה הדבר הזה וישמעו את דברי יהוה וישבו מלכת אל ירבעם  {פ}
2Ch 11:5 ה וישב רחבעם בירושלם ויבן ערים למצור ביהודה
2Ch 11:6 ו ויבן את בית לחם ואת עיטם ואת תקוע
2Ch 11:7 ז ואת בית צור ואת שוכו ואת עדלם
2Ch 11:8 ח ואת גת ואת מרשה ואת זיף
2Ch 11:9 ט ואת אדורים ואת לכיש ואת עזקה
2Ch 11:10 י ואת צרעה ואת אילון ואת חברון אשר ביהודה ובבנימן  ערי מצרות
2Ch 11:11 יא ויחזק את המצורות ויתן בהם נגידים ואצרות מאכל ושמן ויין
2Ch 11:12 יב ובכל עיר ועיר צנות ורמחים ויחזקם להרבה מאד ויהי לו יהודה ובנימן  {ס}
2Ch 11:13 יג והכהנים והלוים אשר בכל ישראל--התיצבו עליו מכל גבולם
2Ch 11:14 יד כי עזבו הלוים את מגרשיהם ואחזתם וילכו ליהודה ולירושלם  כי הזניחם ירבעם ובניו מכהן ליהוה
2Ch 11:15 טו ויעמד לו כהנים לבמות ולשעירים ולעגלים אשר עשה
2Ch 11:16 טז ואחריהם מכל שבטי ישראל הנתנים את לבבם לבקש את יהוה אלהי ישראל--באו ירושלם לזבוח ליהוה אלהי אבותיהם
2Ch 11:17 יז ויחזקו את מלכות יהודה ויאמצו את רחבעם בן שלמה לשנים שלוש  כי הלכו בדרך דויד ושלמה--לשנים שלוש
2Ch 11:18 יח ויקח לו רחבעם אשה--את מחלת בן (בת) ירימות בן דויד  אביהיל בת אליאב בן ישי
2Ch 11:19 יט ותלד לו בנים--את יעוש ואת שמריה ואת זהם
2Ch 11:20 כ ואחריה לקח את מעכה בת אבשלום ותלד לו את אביה ואת עתי ואת זיזא ואת שלמית
2Ch 11:21 כא ויאהב רחבעם את מעכה בת אבשלום מכל נשיו ופילגשיו--כי נשים שמונה עשרה נשא ופילגשים ששים ויולד עשרים ושמונה בנים--וששים בנות
2Ch 11:22 כב ויעמד לראש רחבעם את אביה בן מעכה לנגיד באחיו--כי להמליכו
2Ch 11:23 כג ויבן ויפרץ מכל בניו לכל ארצות יהודה ובנימן לכל ערי המצרות ויתן להם המזון לרב וישאל המון נשים