1Ch 23:1 א ודויד זקן ושבע ימים וימלך את שלמה בנו על ישראל
1Ch 23:2 ב ויאסף את כל שרי ישראל והכהנים והלוים
1Ch 23:3 ג ויספרו הלוים מבן שלשים שנה ומעלה ויהי מספרם לגלגלתם לגברים שלשים ושמונה אלף
1Ch 23:4 ד מאלה לנצח על מלאכת בית יהוה עשרים וארבעה אלף ושטרים ושפטים ששת אלפים
1Ch 23:5 ה וארבעת אלפים שערים וארבעת אלפים מהללים ליהוה בכלים אשר עשיתי להלל  {ס}
1Ch 23:6 ו ויחלקם דויד מחלקות  {ס}  לבני לוי לגרשון קהת ומררי  {ס}
1Ch 23:7 ז לגרשני לעדן ושמעי  {ס}
1Ch 23:8 ח בני לעדן הראש יחיאל וזתם ויואל--שלשה  {ס}
1Ch 23:9 ט בני שמעי שלמות (שלמית) וחזיאל והרן--שלשה אלה ראשי האבות ללעדן  {ס}
1Ch 23:10 י ובני שמעי--יחת זינא ויעוש ובריעה אלה בני שמעי ארבעה
1Ch 23:11 יא ויהי יחת הראש וזיזה השני ויעוש ובריעה לא הרבו בנים ויהיו לבית אב לפקדה אחת  {ס}
1Ch 23:12 יב בני קהת עמרם יצהר חברון ועזיאל--ארבעה  {ס}
1Ch 23:13 יג בני עמרם אהרן ומשה ויבדל אהרן להקדישו קדש קדשים הוא ובניו עד עולם--להקטיר לפני יהוה לשרתו ולברך בשמו עד עולם
1Ch 23:14 יד ומשה איש האלהים--בניו יקראו על שבט הלוי  {ס}
1Ch 23:15 טו בני משה גרשום ואליעזר
1Ch 23:16 טז בני גרשום שבואל הראש
1Ch 23:17 יז ויהיו בני אליעזר רחביה הראש ולא היה לאליעזר בנים אחרים ובני רחביה רבו למעלה  {ס}
1Ch 23:18 יח בני יצהר שלמית הראש
1Ch 23:19 יט בני חברון--יריהו הראש אמריה השני יחזיאל השלישי ויקמעם הרביעי
1Ch 23:20 כ בני עזיאל--מיכה הראש וישיה השני
1Ch 23:21 כא בני מררי מחלי ומושי בני מחלי אלעזר וקיש
1Ch 23:22 כב וימת אלעזר ולא היו לו בנים כי אם בנות וישאום בני קיש אחיהם
1Ch 23:23 כג בני מושי מחלי ועדר וירמות--שלושה  {ס}
1Ch 23:24 כד אלה בני לוי לבית אבותיהם ראשי האבות לפקודיהם במספר שמות לגלגלתם עשה המלאכה לעבדת בית יהוה--מבן עשרים שנה ומעלה
1Ch 23:25 כה כי אמר דויד הניח יהוה אלהי ישראל לעמו וישכן בירושלם עד לעולם
1Ch 23:26 כו וגם ללוים--אין לשאת את המשכן ואת כל כליו לעבדתו
1Ch 23:27 כז כי בדברי דויד האחרונים המה מספר בני לוי מבן עשרים שנה ולמעלה
1Ch 23:28 כח כי מעמדם ליד בני אהרן לעבדת בית יהוה על החצרות ועל הלשכות ועל טהרת לכל קדש--ומעשה עבדת בית האלהים
1Ch 23:29 כט וללחם המערכת ולסלת למנחה ולרקיקי המצות ולמחבת ולמרבכת ולכל משורה ומדה
1Ch 23:30 ל ולעמד בבקר בבקר להדות ולהלל ליהוה וכן לערב
1Ch 23:31 לא ולכל העלות עלות ליהוה לשבתות לחדשים ולמעדים--במספר כמשפט עליהם תמיד לפני יהוה
1Ch 23:32 לב ושמרו את משמרת אהל מועד ואת משמרת הקדש ומשמרת בני אהרן אחיהם--לעבדת בית יהוה  {פ}