1Ch 18:1 א ויהי אחרי כן ויך דויד את פלשתים ויכניעם ויקח את גת ובנתיה מיד פלשתים
1Ch 18:2 ב ויך את מואב ויהיו מואב עבדים לדויד נשאי מנחה
1Ch 18:3 ג ויך דויד את הדדעזר מלך צובה חמתה בלכתו להציב ידו בנהר פרת
1Ch 18:4 ד וילכד דויד ממנו אלף רכב ושבעת אלפים פרשים ועשרים אלף איש רגלי ויעקר דויד את כל הרכב ויותר ממנו מאה רכב
1Ch 18:5 ה ויבא ארם דרמשק לעזור להדדעזר מלך צובה ויך דויד בארם עשרים ושנים אלף איש
1Ch 18:6 ו וישם דויד בארם דרמשק ויהי ארם לדויד עבדים נשאי מנחה ויושע יהוה לדויד בכל אשר הלך
1Ch 18:7 ז ויקח דויד את שלטי הזהב אשר היו על עבדי הדדעזר ויביאם ירושלם
1Ch 18:8 ח ומטבחת ומכון ערי הדדעזר לקח דויד נחשת רבה מאד בה עשה שלמה את ים הנחשת ואת העמודים ואת כלי הנחשת  {פ}
1Ch 18:9 ט וישמע תעו מלך חמת  כי הכה דויד את כל חיל הדדעזר מלך צובה
1Ch 18:10 י וישלח את הדורם בנו אל המלך דויד לשאול (לשאל) לו לשלום ולברכו על אשר נלחם בהדדעזר ויכהו--כי איש מלחמות תעו היה הדדעזר וכל כלי זהב וכסף--ונחשת
1Ch 18:11 יא גם אתם הקדיש המלך דויד ליהוה עם הכסף והזהב אשר נשא מכל הגוים--מאדום וממואב ומבני עמון ומפלשתים ומעמלק
1Ch 18:12 יב ואבשי בן צרויה הכה את אדום בגיא המלח שמונה עשר אלף
1Ch 18:13 יג וישם באדום נציבים ויהיו כל אדום עבדים לדויד ויושע יהוה את דויד בכל אשר הלך
1Ch 18:14 יד וימלך דויד על כל ישראל ויהי עשה משפט וצדקה--לכל עמו
1Ch 18:15 טו ויואב בן צרויה על הצבא ויהושפט בן אחילוד מזכיר
1Ch 18:16 טז וצדוק בן אחיטוב ואבימלך בן אביתר כהנים ושושא סופר
1Ch 18:17 יז ובניהו בן יהוידע על הכרתי והפלתי ובני דויד הראשנים ליד המלך  {פ}