Allepo, 1 Chronicles, Chapter 16

1Ch 16:1 א ויביאו את ארון האלהים ויציגו אתו בתוך האהל אשר נטה לו דויד ויקריבו עלות ושלמים לפני האלהים
1Ch 16:2 ב ויכל דויד מהעלות העלה והשלמים ויברך את העם בשם יהוה
1Ch 16:3 ג ויחלק לכל איש ישראל מאיש ועד אשה--לאיש ככר לחם ואשפר ואשישה
1Ch 16:4 ד ויתן לפני ארון יהוה מן הלוים--משרתים ולהזכיר ולהודות ולהלל ליהוה אלהי ישראל  {ס}
1Ch 16:5 ה אסף הראש ומשנהו זכריה יעיאל ושמירמות ויחיאל ומתתיה ואליאב ובניהו ועבד אדם ויעיאל בכלי נבלים ובכנרות ואסף במצלתים משמיע
1Ch 16:6 ו ובניהו ויחזיאל הכהנים--בחצצרות תמיד לפני ארון ברית האלהים
1Ch 16:7 ז ביום ההוא אז נתן דויד בראש להדות ליהוה--ביד אסף ואחיו  {ש}
1Ch 16:8 ח הודו ליהוה קראו בשמו--  {ס}  הודיעו בעמים עלילתיו  {ר}
1Ch 16:9 ט שירו לו זמרו לו--  {ס}  שיחו בכל נפלאתיו  {ר}
1Ch 16:10 י התהללו בשם קדשו--  {ס}  ישמח לב מבקשי יהוה  {ר}
1Ch 16:11 יא דרשו יהוה ועזו--  {ס}  בקשו פניו תמיד  {ר}
1Ch 16:12 יב זכרו נפלאתיו אשר עשה--  {ס}  מפתיו ומשפטי פיהו  {ר}
1Ch 16:13 יג זרע ישראל עבדו--  {ס}  בני יעקב בחיריו  {ר}
1Ch 16:14 יד הוא יהוה אלהינו--  {ס}  בכל הארץ משפטיו  {ר}
1Ch 16:15 טו זכרו לעולם בריתו--  {ס}  דבר צוה לאלף דור  {ר}
1Ch 16:16 טז אשר כרת את אברהם--  {ס}  ושבועתו ליצחק  {ר}
1Ch 16:17 יז ויעמידה ליעקב לחק--  {ס}  לישראל ברית עולם  {ר}
1Ch 16:18 יח לאמר לך אתן ארץ כנען--  {ס}  חבל נחלתכם  {ר}
1Ch 16:19 יט בהיותכם מתי מספר--  {ס}  כמעט וגרים בה  {ר}
1Ch 16:20 כ ויתהלכו מגוי אל גוי--  {ס}  ומממלכה אל עם אחר  {ר}
1Ch 16:21 כא לא הניח לאיש לעשקם--  {ס}  ויוכח עליהם מלכים  {ר}
1Ch 16:22 כב אל תגעו במשיחי--  {ס}  ובנביאי אל תרעו  {ר} {ש}
1Ch 16:23 כג שירו ליהוה כל הארץ--  {ס}  בשרו מיום אל יום ישועתו  {ר}
1Ch 16:24 כד ספרו בגוים את כבודו--  {ס}  בכל העמים נפלאתיו  {ר}
1Ch 16:25 כה כי גדול יהוה ומהלל מאד--  {ס}  ונורא הוא על כל אלהים  {ר}
1Ch 16:26 כו כי כל אלהי העמים אלילים--  {ס}  ויהוה שמים עשה  {ר}
1Ch 16:27 כז הוד והדר לפניו--  {ס}  עז וחדוה במקמו  {ר}
1Ch 16:28 כח הבו ליהוה משפחות עמים--  {ס}  הבו ליהוה כבוד ועז  {ר}
1Ch 16:29 כט הבו ליהוה כבוד שמו  {ס}  שאו מנחה ובאו לפניו--  {ר} השתחוו ליהוה בהדרת קדש  {ס}
1Ch 16:30 ל חילו מלפניו כל הארץ--  {ר} אף תכון תבל בל תמוט  {ס}
1Ch 16:31 לא ישמחו השמים ותגל הארץ--  {ר} ויאמרו בגוים יהוה מלך  {ס}
1Ch 16:32 לב ירעם הים ומלואו--  {ר} יעלץ השדה וכל אשר בו  {ס}
1Ch 16:33 לג אז ירננו עצי היער  {ר} מלפני יהוה--כי בא לשפוט את הארץ  {ס}
1Ch 16:34 לד הודו ליהוה כי טוב--  {ר} כי לעולם חסדו  {ס}
1Ch 16:35 לה ואמרו--הושיענו אלהי ישענו  {ר} וקבצנו והצילנו מן הגוים  {ס}  להדות לשם קדשך  {ר} להשתבח בתהלתך  {ס}
1Ch 16:36 לו ברוך יהוה אלהי ישראל--  {ר} מן העולם ועד העלם ויאמרו כל העם אמן--  {ס}  והלל ליהוה  {ר} {ש}
1Ch 16:37 לז ויעזב שם לפני ארון ברית יהוה לאסף ולאחיו  לשרת לפני הארון תמיד--לדבר יום ביומו
1Ch 16:38 לח ועבד אדם ואחיהם ששים ושמונה  {ס}  ועבד אדם בן ידיתון וחסה לשערים
1Ch 16:39 לט ואת צדוק הכהן ואחיו הכהנים לפני משכן יהוה--בבמה אשר בגבעון
1Ch 16:40 מ להעלות עלות ליהוה על מזבח העלה תמיד--לבקר ולערב ולכל הכתוב בתורת יהוה אשר צוה על ישראל
1Ch 16:41 מא ועמהם הימן וידותון ושאר הברורים אשר נקבו בשמות--להדות ליהוה כי לעולם חסדו
1Ch 16:42 מב ועמהם הימן וידותון חצצרות ומצלתים למשמיעים וכלי שיר האלהים ובני ידותון לשער
1Ch 16:43 מג וילכו כל העם איש לביתו ויסב דויד לברך את ביתו  {פ}