Allepo, 1 Chronicles, Chapter 14

1Ch 14:1 א וישלח חירם (חורם) מלך צר מלאכים אל דויד ועצי ארזים וחרשי קיר וחרשי עצים--לבנות לו בית
1Ch 14:2 ב וידע דויד כי הכינו יהוה למלך על ישראל  כי נשאת למעלה מלכותו בעבור עמו ישראל  {ס}
1Ch 14:3 ג ויקח דויד עוד נשים בירושלם ויולד דויד עוד בנים ובנות
1Ch 14:4 ד ואלה שמות הילודים אשר היו לו בירושלם  שמוע ושובב נתן ושלמה
1Ch 14:5 ה ויבחר ואלישוע ואלפלט
1Ch 14:6 ו ונגה ונפג ויפיע
1Ch 14:7 ז ואלישמע ובעלידע ואליפלט  {פ}
1Ch 14:8 ח וישמעו פלשתים כי נמשח דויד למלך על כל ישראל ויעלו כל פלשתים לבקש את דויד וישמע דויד ויצא לפניהם
1Ch 14:9 ט ופלשתים באו ויפשטו בעמק רפאים
1Ch 14:10 י וישאל דויד באלהים לאמר--האעלה על פלשתיים (פלשתים) ונתתם בידי ויאמר לו יהוה עלה ונתתים בידך
1Ch 14:11 יא ויעלו בבעל פרצים ויכם שם דויד ויאמר דויד פרץ האלהים את אויבי בידי כפרץ מים על כן קראו שם המקום ההוא--בעל פרצים
1Ch 14:12 יב ויעזבו שם את אלהיהם ויאמר דויד וישרפו באש  {פ}
1Ch 14:13 יג ויסיפו עוד פלשתים ויפשטו בעמק
1Ch 14:14 יד וישאל עוד דויד באלהים ויאמר לו האלהים לא תעלה אחריהם  הסב מעליהם ובאת להם ממול הבכאים
1Ch 14:15 טו ויהי כשמעך את קול הצעדה בראשי הבכאים--אז תצא במלחמה  כי יצא האלהים לפניך להכות את מחנה פלשתים
1Ch 14:16 טז ויעש דויד כאשר צוהו האלהים ויכו את מחנה פלשתים מגבעון ועד גזרה
1Ch 14:17 יז ויצא שם דויד בכל הארצות ויהוה נתן את פחדו על כל הגוים