1Ch 12:1 א ואלה הבאים אל דויד לציקלג עוד עצור מפני שאול בן קיש והמה בגבורים עזרי המלחמה
1Ch 12:2 ב נשקי קשת מימינים ומשמאלים באבנים ובחצים בקשת--מאחי שאול מבנימן
1Ch 12:3 ג הראש אחיעזר ויואש בני השמעה הגבעתי ויזואל (ויזיאל) ופלט בני עזמות וברכה ויהוא הענתתי
1Ch 12:4 ד וישמעיה הגבעוני גבור בשלשים ועל השלשים
1Ch 12:5 ה וירמיה ויחזיאל ויוחנן ויוזבד הגדרתי  {ס}
1Ch 12:6 ו אלעוזי וירימות ובעליה ושמריהו ושפטיהו החריפי (החרופי)
1Ch 12:7 ז אלקנה וישיהו ועזראל ויועזר וישבעם--הקרחים
1Ch 12:8 ח ויועאלה וזבדיה בני ירחם מן הגדור
1Ch 12:9 ט ומן הגדי נבדלו אל דויד למצד מדברה גברי החיל אנשי צבא למלחמה--ערכי צנה ורמח ופני אריה פניהם וכצבאים על ההרים למהר
1Ch 12:10 י עזר הראש עבדיה השני אליאב השלשי
1Ch 12:11 יא משמנה הרביעי ירמיה החמשי
1Ch 12:12 יב עתי הששי אליאל השבעי
1Ch 12:13 יג יוחנן השמיני אלזבד התשיעי
1Ch 12:14 יד ירמיהו העשירי מכבני עשתי עשר  {ס}
1Ch 12:15 טו אלה מבני גד ראשי הצבא אחד למאה הקטן והגדול לאלף
1Ch 12:16 טז אלה הם אשר עברו את הירדן בחדש הראשון והוא ממלא על כל גדיתיו (גדותיו) ויבריחו את כל העמקים למזרח ולמערב  {פ}
1Ch 12:17 יז ויבאו מן בני בנימן ויהודה עד למצד לדויד
1Ch 12:18 יח ויצא דויד לפניהם ויען ויאמר להם אם לשלום באתם אלי לעזרני יהיה לי עליכם לבב ליחד ואם לרמותני לצרי בלא חמס בכפי ירא אלהי אבותינו ויוכח  {ס}
1Ch 12:19 יט ורוח לבשה את עמשי ראש השלושים (השלישים) לך דויד ועמך בן ישי שלום שלום לך ושלום לעזרך כי עזרך אלהיך ויקבלם דויד ויתנם בראשי הגדוד  {פ}
1Ch 12:20 כ וממנשה נפלו על דויד בבאו עם פלשתים על שאול למלחמה--ולא עזרם  כי בעצה שלחהו סרני פלשתים לאמר בראשינו יפול אל אדניו שאול
1Ch 12:21 כא בלכתו אל ציקלג נפלו עליו ממנשה עדנח ויוזבד וידיעאל ומיכאל ויוזבד ואליהוא וצלתי  ראשי האלפים אשר למנשה
1Ch 12:22 כב והמה עזרו עם דויד על הגדוד כי גבורי חיל כלם ויהיו שרים בצבא
1Ch 12:23 כג כי לעת יום ביום יבאו על דויד לעזרו--עד למחנה גדול כמחנה אלהים  {פ}
1Ch 12:24 כד ואלה מספרי ראשי החלוץ לצבא באו על דויד חברונה  להסב מלכות שאול אליו--כפי יהוה  {ס}
1Ch 12:25 כה בני יהודה נשאי צנה ורמח--ששת אלפים ושמונה מאות חלוצי צבא  {ס}
1Ch 12:26 כו מן בני שמעון גבורי חיל לצבא--שבעת אלפים ומאה  {ס}
1Ch 12:27 כז מן בני הלוי--ארבעת אלפים ושש מאות  {ס}
1Ch 12:28 כח ויהוידע הנגיד לאהרן ועמו שלשת אלפים ושבע מאות  {ס}
1Ch 12:29 כט וצדוק נער גבור חיל ובית אביו שרים עשרים ושנים  {ס}
1Ch 12:30 ל ומן בני בנימן אחי שאול שלשת אלפים ועד הנה מרביתם שמרים משמרת בית שאול  {ס}
1Ch 12:31 לא ומן בני אפרים עשרים אלף ושמונה מאות--גבורי חיל אנשי שמות לבית אבותם  {ס}
1Ch 12:32 לב ומחצי מטה מנשה שמונה עשר אלף אשר נקבו בשמות לבוא להמליך את דויד  {ס}
1Ch 12:33 לג ומבני יששכר יודעי בינה לעתים לדעת מה יעשה ישראל--ראשיהם מאתים וכל אחיהם על פיהם  {ס}
1Ch 12:34 לד מזבלון יוצאי צבא ערכי מלחמה בכל כלי מלחמה--חמשים אלף  ולעדר בלא לב ולב  {ס}
1Ch 12:35 לה ומנפתלי שרים אלף ועמהם בצנה וחנית שלשים ושבעה אלף  {ס}
1Ch 12:36 לו ומן הדני ערכי מלחמה עשרים ושמונה אלף ושש מאות  {ס}
1Ch 12:37 לז ומאשר יוצאי צבא לערך מלחמה--ארבעים אלף  {ס}
1Ch 12:38 לח ומעבר לירדן מן הראובני והגדי וחצי שבט מנשה בכל כלי צבא מלחמה--מאה ועשרים אלף  {ס}
1Ch 12:39 לט כל אלה אנשי מלחמה עדרי מערכה בלבב שלם באו חברונה להמליך את דויד על כל ישראל וגם כל שרית ישראל לב אחד--להמליך את דויד
1Ch 12:40 מ ויהיו שם עם דויד ימים שלושה אכלים ושותים  כי הכינו להם אחיהם [ (I Chronicles 12:41) מא וגם הקרובים אליהם עד יששכר וזבלון ונפתלי מביאים לחם בחמורים ובגמלים ובפרדים ובבקר מאכל קמח דבלים וצמוקים ויין ושמן ובקר וצאן--לרב  כי שמחה בישראל  {פ} ]