1Ch 10:1 א ופלשתים נלחמו בישראל וינס איש ישראל מפני פלשתים ויפלו חללים בהר גלבע
1Ch 10:2 ב וידבקו פלשתים אחרי שאול ואחרי בניו ויכו פלשתים את יונתן ואת אבינדב ואת מלכישוע--בני שאול
1Ch 10:3 ג ותכבד המלחמה על שאול וימצאהו המורים בקשת ויחל מן היורים
1Ch 10:4 ד ויאמר שאול אל נשא כליו שלף חרבך ודקרני בה פן יבאו הערלים האלה והתעללו בי ולא אבה נשא כליו כי ירא מאד  {ס}  ויקח שאול את החרב ויפל עליה
1Ch 10:5 ה וירא נשא כליו כי מת שאול ויפל גם הוא על החרב וימת  {ס}
1Ch 10:6 ו וימת שאול ושלשת בניו וכל ביתו יחדו מתו
1Ch 10:7 ז ויראו כל איש ישראל אשר בעמק כי נסו וכי מתו שאול ובניו ויעזבו עריהם וינסו ויבאו פלשתים וישבו בהם  {ס}
1Ch 10:8 ח ויהי ממחרת ויבאו פלשתים לפשט את החללים וימצאו את שאול ואת בניו נפלים בהר גלבע
1Ch 10:9 ט ויפשיטהו--וישאו את ראשו ואת כליו וישלחו בארץ פלשתים סביב לבשר את עצביהם--ואת העם
1Ch 10:10 י וישימו את כליו בית אלהיהם ואת גלגלתו תקעו בית דגון  {ס}
1Ch 10:11 יא וישמעו כל יביש גלעד את כל אשר עשו פלשתים לשאול
1Ch 10:12 יב ויקומו כל איש חיל וישאו את גופת שאול ואת גופת בניו ויביאום יבישה ויקברו את עצמותיהם תחת האלה ביבש ויצומו שבעת ימים
1Ch 10:13 יג וימת שאול במעלו אשר מעל ביהוה על דבר יהוה אשר לא שמר וגם לשאול באוב לדרוש
1Ch 10:14 יד ולא דרש ביהוה וימיתהו ויסב את המלוכה לדויד בן ישי  {פ}