1Ch 9:1 א וכל ישראל התיחשו והנם כתובים על ספר מלכי ישראל ויהודה הגלו לבבל במעלם  {ס}
1Ch 9:2 ב והיושבים הראשנים אשר באחזתם בעריהם  ישראל הכהנים הלוים והנתינים
1Ch 9:3 ג ובירושלם ישבו מן בני יהודה ומן בני בנימן--ומן בני אפרים ומנשה
1Ch 9:4 ד עותי בן עמיהוד בן עמרי בן אמרי בן בנימן (בני מן) בני פרץ בן יהודה  {ס}
1Ch 9:5 ה ומן השילוני עשיה הבכור ובניו
1Ch 9:6 ו ומן בני זרח יעואל ואחיהם שש מאות ותשעים
1Ch 9:7 ז ומן בני בנימן--סלוא בן משלם בן הודויה בן הסנאה
1Ch 9:8 ח ויבניה בן ירחם ואלה בן עזי בן מכרי ומשלם בן שפטיה בן רעואל בן יבניה
1Ch 9:9 ט ואחיהם לתלדותם תשע מאות וחמשים וששה כל אלה אנשים ראשי אבות לבית אבתיהם  {ס}
1Ch 9:10 י ומן הכהנים  ידעיה ויהויריב ויכין
1Ch 9:11 יא ועזריה בן חלקיה בן משלם בן צדוק בן מריות בן אחיטוב נגיד בית האלהים  {ס}
1Ch 9:12 יב ועדיה בן ירחם בן פשחור בן מלכיה ומעשי בן עדיאל בן יחזרה בן משלם בן משלמית בן אמר
1Ch 9:13 יג ואחיהם ראשים לבית אבותם אלף ושבע מאות וששים--גבורי חיל מלאכת עבודת בית האלהים
1Ch 9:14 יד ומן הלוים  שמעיה בן חשוב בן עזריקם בן חשביה מן בני מררי
1Ch 9:15 טו ובקבקר חרש וגלל ומתניה בן מיכא בן זכרי בן אסף
1Ch 9:16 טז ועבדיה בן שמעיה בן גלל בן ידותון וברכיה בן אסא בן אלקנה היושב בחצרי נטופתי
1Ch 9:17 יז והשערים שלום ועקוב וטלמן ואחימן ואחיהם שלום הראש
1Ch 9:18 יח ועד הנה בשער המלך מזרחה המה השערים למחנות בני לוי
1Ch 9:19 יט ושלום בן קורא בן אביסף בן קרח ואחיו לבית אביו הקרחים על מלאכת העבודה שמרי הספים לאהל ואבתיהם על מחנה יהוה שמרי המבוא
1Ch 9:20 כ ופינחס בן אלעזר נגיד היה עליהם לפנים--יהוה עמו
1Ch 9:21 כא זכריה בן משלמיה שער פתח לאהל מועד
1Ch 9:22 כב כלם הברורים לשערים בספים מאתים ושנים עשר המה בחצריהם התיחשם המה יסד דויד ושמואל הראה באמונתם
1Ch 9:23 כג והם ובניהם על השערים לבית יהוה לבית האהל--למשמרות
1Ch 9:24 כד לארבע רוחות יהיו השערים  מזרח ימה צפונה ונגבה
1Ch 9:25 כה ואחיהם בחצריהם לבוא לשבעת הימים מעת אל עת--עם אלה
1Ch 9:26 כו כי באמונה המה ארבעת גברי השערים--הם הלוים והיו על הלשכות ועל האצרות בית האלהים
1Ch 9:27 כז וסביבות בית האלהים ילינו  כי עליהם משמרת והם על המפתח ולבקר לבקר
1Ch 9:28 כח ומהם על כלי העבודה  כי במספר יביאום ובמספר יוציאום
1Ch 9:29 כט ומהם ממנים על הכלים ועל כל כלי הקדש ועל הסלת והיין והשמן והלבונה והבשמים
1Ch 9:30 ל ומן בני הכהנים רקחי המרקחת לבשמים
1Ch 9:31 לא ומתתיה מן הלוים הוא הבכור לשלם הקרחי--באמונה על מעשה החבתים
1Ch 9:32 לב ומן בני הקהתי מן אחיהם על לחם המערכת להכין שבת שבת
1Ch 9:33 לג ואלה המשררים ראשי אבות ללוים בלשכת--פטירים (פטורים)  כי יומם ולילה עליהם במלאכה
1Ch 9:34 לד אלה ראשי האבות ללוים לתלדותם ראשים אלה ישבו בירושלם  {ס}
1Ch 9:35 לה ובגבעון ישבו אבי גבעון יעואל (יעיאל) ושם אשתו מעכה
1Ch 9:36 לו ובנו הבכור עבדון וצור וקיש ובעל ונר ונדב
1Ch 9:37 לז וגדור ואחיו וזכריה ומקלות
1Ch 9:38 לח ומקלות הוליד את שמאם ואף הם נגד אחיהם ישבו בירושלם--עם אחיהם  {ס}
1Ch 9:39 לט ונר הוליד את קיש וקיש הוליד את שאול ושאול הוליד את יהונתן ואת מלכישוע ואת אבינדב ואת אשבעל
1Ch 9:40 מ ובן יהונתן מריב בעל ומרי בעל הוליד את מיכה
1Ch 9:41 מא ובני מיכה--פיתן ומלך ותחרע
1Ch 9:42 מב ואחז הוליד את יערה ויערה הוליד את עלמת ואת עזמות ואת זמרי וזמרי הוליד את מוצא
1Ch 9:43 מג ומוצא הוליד את בנעא ורפיה בנו אלעשה בנו אצל בנו
1Ch 9:44 מד ולאצל ששה בנים ואלה שמותם עזריקם בכרו וישמעאל ושעריה ועבדיה וחנן אלה בני אצל  {פ}