2Sm 23:1 א ואלה דברי דוד האחרנים  נאם דוד בן ישי ונאם הגבר הקם על--משיח אלהי יעקב ונעים זמרות ישראל
2Sm 23:2 ב רוח יהוה דבר בי ומלתו על לשוני
2Sm 23:3 ג אמר אלהי ישראל לי דבר צור ישראל  מושל באדם--צדיק מושל יראת אלהים
2Sm 23:4 ד וכאור בקר יזרח שמש בקר לא עבות מנגה ממטר דשא מארץ
2Sm 23:5 ה כי לא כן ביתי עם אל  כי ברית עולם שם לי ערוכה בכל ושמרה--כי כל ישעי וכל חפץ כי לא יצמיח
2Sm 23:6 ו ובליעל כקוץ מנד כלהם  כי לא ביד יקחו
2Sm 23:7 ז ואיש יגע בהם ימלא ברזל ועץ חנית ובאש שרוף ישרפו בשבת  {פ}
2Sm 23:8 ח אלה שמות הגברים אשר לדוד  ישב בשבת תחכמני ראש השלשי הוא עדינו העצנו (העצני)--על שמנה מאות חלל בפעם אחד (אחת)  {ס}
2Sm 23:9 ט ואחרו אלעזר בן דדי (דדו) בן אחחי בשלשה גברים (הגברים) עם דוד בחרפם בפלשתים נאספו שם למלחמה ויעלו איש ישראל
2Sm 23:10 י הוא קם ויך בפלשתים עד כי יגעה ידו ותדבק ידו אל החרב ויעש יהוה תשועה גדולה ביום ההוא והעם ישבו אחריו אך לפשט  {ס}
2Sm 23:11 יא ואחריו שמה בן אגא הררי ויאספו פלשתים לחיה ותהי שם חלקת השדה מלאה עדשים והעם נס מפני פלשתים
2Sm 23:12 יב ויתיצב בתוך החלקה ויצילה ויך את פלשתים ויעש יהוה תשועה גדולה  {ס}
2Sm 23:13 יג וירדו שלשים (שלשה) מהשלשים ראש ויבאו אל קציר אל דוד--אל מערת עדלם וחית פלשתים חנה בעמק רפאים
2Sm 23:14 יד ודוד אז במצודה ומצב פלשתים אז בית לחם
2Sm 23:15 טו ויתאוה דוד ויאמר  מי ישקני מים מבאר בית לחם אשר בשער  {ס}
2Sm 23:16 טז ויבקעו שלשת הגברים במחנה פלשתים וישאבו מים מבאר בית לחם אשר בשער וישאו ויבאו אל דוד ולא אבה לשתותם ויסך אתם ליהוה
2Sm 23:17 יז ויאמר חלילה לי יהוה מעשתי זאת הדם האנשים ההלכים בנפשותם ולא אבה לשתותם אלה עשו שלשת הגברים  {ס}
2Sm 23:18 יח ואבישי אחי יואב בן צרויה הוא ראש השלשי (השלשה) והוא עורר את חניתו על שלש מאות חלל ולו שם בשלשה
2Sm 23:19 יט מן השלשה הכי נכבד ויהי להם לשר ועד השלשה לא בא  {ס}
2Sm 23:20 כ ובניהו בן יהוידע בן איש חי (חיל) רב פעלים מקבצאל הוא הכה את שני אראל מואב והוא ירד והכה את האריה (הארי) בתוך הבאר ביום השלג
2Sm 23:21 כא והוא הכה את איש מצרי אשר (איש) מראה וביד המצרי חנית וירד אליו בשבט ויגזל את החנית מיד המצרי ויהרגהו בחניתו
2Sm 23:22 כב אלה עשה בניהו בן יהוידע ולו שם בשלשה הגברים
2Sm 23:23 כג מן השלשים נכבד ואל השלשה לא בא וישמהו דוד  {ר} אל משמעתו  {ס}
2Sm 23:24 כד עשהאל אחי יואב בשלשים אלחנן בן דדו  {ר} בית לחם  {ס}
2Sm 23:25 כה שמה החרדי  {ס}  אליקא  {ר} החרדי  {ס}
2Sm 23:26 כו חלץ הפלטי  {ס}  עירא  {ר} בן עקש  {ס}  התקועי  {ס}
2Sm 23:27 כז אביעזר  {ר} הענתתי  {ס}  מבני החשתי  {ס}
2Sm 23:28 כח צלמון  {ר} האחחי  {ס}  מהרי הנטפתי  {ס}
2Sm 23:29 כט חלב בן בענה  {ר} הנטפתי  {ס}  אתי בן ריבי מגבעת בני בנימן  {ס}
2Sm 23:30 ל בניהו  {ר} פרעתני  {ס}  הדי מנחלי געש  {ס}
2Sm 23:31 לא אבי עלבון  {ר} הערבתי  {ס}  עזמות הברחמי  {ס}
2Sm 23:32 לב אליחבא  {ר} השעלבני  {ס}  בני ישן יהונתן  {ס}
2Sm 23:33 לג שמה  {ר} ההררי  {ס}  אחיאם בן שרר האררי  {ס}
2Sm 23:34 לד אליפלט  {ר} בן אחסבי בן המעכתי  {ס}  אליעם בן אחיתפל  {ר} הגלני  {ס}
2Sm 23:35 לה חצרו (חצרי) הכרמלי  {ס}  פערי  {ר} הארבי  {ס}
2Sm 23:36 לו יגאל בן נתן מצבה  {ס}  בני  {ר} הגדי  {ס}
2Sm 23:37 לז צלק העמני  {ס}  נחרי  {ר} הבארתי--נשאי (נשא) כלי יואב בן צריה  {ס}
2Sm 23:38 לח עירא  {ר} היתרי  {ס}  גרב היתרי  {ס}
2Sm 23:39 לט אוריה  {ר} החתי--כל שלשים ושבעה  {פ}