Allepo, 2 Samuel, Chapter 22

2Sm 22:1 א וידבר דוד ליהוה את דברי השירה הזאת  {ס}  ביום הציל יהוה אתו  {ר} מכף כל איביו ומכף שאול  {ס}
2Sm 22:2 ב ויאמר  יהוה סלעי ומצדתי  {ר} ומפלטי לי
2Sm 22:3 ג אלהי צורי אחסה בו  {ס}  מגני וקרן ישעי  {ר} משגבי ומנוסי  {ס}  משעי מחמס תשעני  {ר}
2Sm 22:4 ד מהלל אקרא יהוה  {ס}  ומאיבי אושע  {ר}
2Sm 22:5 ה כי אפפני משברי מות  {ס}  נחלי בליעל יבעתני  {ר}
2Sm 22:6 ו חבלי שאול סבני  {ס}  קדמני מקשי מות  {ר}
2Sm 22:7 ז בצר לי אקרא יהוה ואל אלהי אקרא  {ס}  וישמע מהיכלו קולי ושועתי באזניו  {ר}
2Sm 22:8 ח ותגעש (ויתגעש) ותרעש הארץ  {ס}  מוסדות השמים ירגזו ויתגעשו כי חרה לו  {ר}
2Sm 22:9 ט עלה עשן באפו ואש מפיו תאכל  {ס}  גחלים בערו ממנו  {ר}
2Sm 22:10 י ויט שמים וירד  {ס}  וערפל תחת רגליו  {ר}
2Sm 22:11 יא וירכב על כרוב ויעף  {ס}  וירא על כנפי רוח  {ר}
2Sm 22:12 יב וישת חשך סביבתיו סכות  {ס}  חשרת מים עבי שחקים  {ר}
2Sm 22:13 יג מנגה נגדו בערו גחלי אש  {ס}
2Sm 22:14 יד ירעם מן שמים יהוה  {ר} ועליון יתן קולו  {ס}
2Sm 22:15 טו וישלח חצים ויפיצם ברק ויהמם (ויהם)  {ר}
2Sm 22:16 טז ויראו אפקי ים יגלו מסדות תבל  {ס}  בגערת יהוה מנשמת רוח אפו  {ר}
2Sm 22:17 יז ישלח ממרום יקחני  {ס}  ימשני ממים רבים  {ר}
2Sm 22:18 יח יצילני מאיבי עז  {ס}  משנאי כי אמצו ממני  {ר}
2Sm 22:19 יט יקדמני ביום אידי ויהי יהוה משען לי  {ס}
2Sm 22:20 כ ויצא למרחב אתי  {ר} יחלצני כי חפץ בי  {ס}
2Sm 22:21 כא יגמלני יהוה כצדקתי  {ר} כבר ידי ישיב לי  {ס}
2Sm 22:22 כב כי שמרתי דרכי יהוה  {ר} ולא רשעתי מאלהי  {ס}
2Sm 22:23 כג כי כל משפטו לנגדי וחקתיו לא אסור ממנה  {ר}
2Sm 22:24 כד ואהיה תמים לו  {ס}  ואשתמרה מעוני  {ר}
2Sm 22:25 כה וישב יהוה לי כצדקתי  {ס}  כברי לנגד עיניו  {ר}
2Sm 22:26 כו עם חסיד תתחסד  {ס}  עם גבור תמים תתמם  {ר}
2Sm 22:27 כז עם נבר תתבר  {ס}  ועם עקש תתפל  {ר}
2Sm 22:28 כח ואת עם עני תושיע  {ס}  ועיניך על רמים תשפיל  {ר}
2Sm 22:29 כט כי אתה נירי יהוה  {ס}  ויהוה יגיה חשכי  {ר}
2Sm 22:30 ל כי בכה ארוץ גדוד  {ס}  באלהי אדלג שור  {ר}
2Sm 22:31 לא האל תמים דרכו אמרת יהוה צרופה--  {ס}  מגן הוא לכל החסים בו  {ר}
2Sm 22:32 לב כי מי אל מבלעדי יהוה  {ס}  ומי צור מבלעדי אלהינו  {ר}
2Sm 22:33 לג האל מעוזי חיל  {ס}  ויתר תמים דרכו (דרכי)  {ר}
2Sm 22:34 לד משוה רגליו (רגלי) כאילות  {ס}  ועל במתי יעמדני  {ר}
2Sm 22:35 לה מלמד ידי למלחמה  {ס}  ונחת קשת נחושה זרעתי  {ר}
2Sm 22:36 לו ותתן לי מגן ישעך וענתך תרבני  {ס}
2Sm 22:37 לז תרחיב צעדי תחתני ולא מעדו קרסלי  {ר}
2Sm 22:38 לח ארדפה איבי ואשמידם  {ס}  ולא אשוב עד כלותם  {ר}
2Sm 22:39 לט ואכלם ואמחצם ולא יקומון  {ס}  ויפלו תחת רגלי  {ר}
2Sm 22:40 מ ותזרני חיל למלחמה  {ס}  תכריע קמי תחתני  {ר}
2Sm 22:41 מא ואיבי תתה לי ערף משנאי ואצמיתם  {ס}
2Sm 22:42 מב ישעו ואין משיע אל יהוה ולא ענם  {ר}
2Sm 22:43 מג ואשחקם כעפר ארץ  {ס}  כטיט חוצות אדקם ארקעם  {ר}
2Sm 22:44 מד ותפלטני מריבי עמי תשמרני לראש גוים  {ס}  עם לא ידעתי יעבדני  {ר}
2Sm 22:45 מה בני נכר יתכחשו לי לשמוע אזן ישמעו לי  {ס}
2Sm 22:46 מו בני נכר יבלו ויחגרו ממסגרותם  {ר}
2Sm 22:47 מז חי יהוה וברוך צורי  {ס}  וירם אלהי צור ישעי  {ר}
2Sm 22:48 מח האל הנתן נקמת לי  {ס}  ומריד עמים תחתני  {ר}
2Sm 22:49 מט ומוציאי מאיבי ומקמי תרוממני  {ס}  מאיש חמסים תצילני  {ר}
2Sm 22:50 נ על כן אודך יהוה בגוים  {ס}  ולשמך אזמר  {ר}
2Sm 22:51 נא מגדיל (מגדול) ישועות מלכו ועשה חסד למשיחו  {ס}  לדוד ולזרעו עד עולם  {ר} {ש}