1Sm 8:1 א ויהי כאשר זקן שמואל וישם את בניו שפטים לישראל
1Sm 8:2 ב ויהי שם בנו הבכור יואל ושם משנהו אביה--שפטים בבאר שבע
1Sm 8:3 ג ולא הלכו בניו בדרכו ויטו אחרי הבצע ויקחו שחד--ויטו משפט  {פ}
1Sm 8:4 ד ויתקבצו כל זקני ישראל ויבאו אל שמואל הרמתה
1Sm 8:5 ה ויאמרו אליו הנה אתה זקנת ובניך לא הלכו בדרכיך עתה שימה לנו מלך לשפטנו--ככל הגוים
1Sm 8:6 ו וירע הדבר בעיני שמואל כאשר אמרו תנה לנו מלך לשפטנו ויתפלל שמואל אל יהוה  {פ}
1Sm 8:7 ז ויאמר יהוה אל שמואל שמע בקול העם לכל אשר יאמרו אליך  כי לא אתך מאסו כי אתי מאסו ממלך עליהם
1Sm 8:8 ח ככל המעשים אשר עשו מיום העלתי אותם ממצרים ועד היום הזה ויעזבני ויעבדו אלהים אחרים--כן המה עשים גם לך
1Sm 8:9 ט ועתה שמע בקולם  אך כי העד תעיד בהם והגדת להם משפט המלך אשר ימלך עליהם  {ס}
1Sm 8:10 י ויאמר שמואל את כל דברי יהוה אל העם השאלים מאתו מלך  {ס}
1Sm 8:11 יא ויאמר--זה יהיה משפט המלך אשר ימלך עליכם  את בניכם יקח ושם לו במרכבתו ובפרשיו ורצו לפני מרכבתו
1Sm 8:12 יב ולשום לו שרי אלפים ושרי חמשים ולחרש חרישו ולקצר קצירו ולעשות כלי מלחמתו וכלי רכבו
1Sm 8:13 יג ואת בנותיכם יקח לרקחות ולטבחות ולאפות
1Sm 8:14 יד ואת שדותיכם ואת כרמיכם וזיתיכם הטובים--יקח ונתן לעבדיו
1Sm 8:15 טו וזרעיכם וכרמיכם יעשר ונתן לסריסיו ולעבדיו
1Sm 8:16 טז ואת עבדיכם ואת שפחותיכם ואת בחוריכם הטובים ואת חמוריכם--יקח ועשה למלאכתו
1Sm 8:17 יז צאנכם יעשר ואתם תהיו לו לעבדים
1Sm 8:18 יח וזעקתם ביום ההוא מלפני מלככם אשר בחרתם לכם ולא יענה יהוה אתכם ביום ההוא
1Sm 8:19 יט וימאנו העם לשמע בקול שמואל ויאמרו לא כי אם מלך יהיה עלינו
1Sm 8:20 כ והיינו גם אנחנו ככל הגוים ושפטנו מלכנו ויצא לפנינו ונלחם את מלחמתנו
1Sm 8:21 כא וישמע שמואל את כל דברי העם וידברם באזני יהוה  {פ}
1Sm 8:22 כב ויאמר יהוה אל שמואל שמע בקולם והמלכת להם מלך ויאמר שמואל אל אנשי ישראל לכו איש לעירו  {פ}