Jdg 17:1 א ויהי איש מהר אפרים ושמו מיכיהו
Jdg 17:2 ב ויאמר לאמו אלף ומאה הכסף אשר לקח לך ואתי (ואת) אלית וגם אמרת באזני הנה הכסף אתי אני לקחתיו ותאמר אמו ברוך בני ליהוה
Jdg 17:3 ג וישב את אלף ומאה הכסף לאמו ותאמר אמו הקדש הקדשתי את הכסף ליהוה מידי לבני לעשות פסל ומסכה ועתה אשיבנו לך
Jdg 17:4 ד וישב את הכסף לאמו ותקח אמו מאתים כסף ותתנהו לצורף ויעשהו פסל ומסכה ויהי בבית מיכיהו
Jdg 17:5 ה והאיש מיכה לו בית אלהים ויעש אפוד ותרפים וימלא את יד אחד מבניו ויהי לו לכהן
Jdg 17:6 ו בימים ההם אין מלך בישראל  איש הישר בעיניו יעשה  {פ}
Jdg 17:7 ז ויהי נער מבית לחם יהודה ממשפחת יהודה והוא לוי והוא גר שם
Jdg 17:8 ח וילך האיש מהעיר מבית לחם יהודה לגור באשר ימצא ויבא הר אפרים עד בית מיכה לעשות דרכו
Jdg 17:9 ט ויאמר לו מיכה מאין תבוא ויאמר אליו לוי אנכי מבית לחם יהודה ואנכי הלך לגור באשר אמצא
Jdg 17:10 י ויאמר לו מיכה שבה עמדי והיה לי לאב ולכהן ואנכי אתן לך עשרת כסף לימים וערך בגדים ומחיתך וילך הלוי
Jdg 17:11 יא ויואל הלוי לשבת את האיש ויהי הנער לו כאחד מבניו
Jdg 17:12 יב וימלא מיכה את יד הלוי ויהי לו הנער לכהן ויהי בבית מיכה
Jdg 17:13 יג ויאמר מיכה--עתה ידעתי כי ייטיב יהוה לי  כי היה לי הלוי לכהן  {פ}