Allepo, Joshua, Chapter 21

Jos 21:1 א ויגשו ראשי אבות הלוים אל אלעזר הכהן ואל יהושע בן נון ואל ראשי אבות המטות לבני ישראל
Jos 21:2 ב וידברו אליהם בשלה בארץ כנען לאמר יהוה צוה ביד משה לתת לנו ערים לשבת ומגרשיהן לבהמתנו  {פ}
Jos 21:3 ג ויתנו בני ישראל ללוים מנחלתם אל פי יהוה את הערים האלה ואת מגרשיהן
Jos 21:4 ד ויצא הגורל למשפחת הקהתי ויהי לבני אהרן הכהן מן הלוים ממטה יהודה וממטה השמעני וממטה בנימן בגורל--ערים שלש עשרה  {ס}
Jos 21:5 ה ולבני קהת הנותרים ממשפחת מטה אפרים וממטה דן ומחצי מטה מנשה בגורל--ערים עשר  {ס}
Jos 21:6 ו ולבני גרשון ממשפחות מטה יששכר וממטה אשר וממטה נפתלי ומחצי מטה מנשה בבשן בגורל--ערים שלש עשרה  {ס}
Jos 21:7 ז לבני מררי למשפחתם ממטה ראובן וממטה גד וממטה זבולן--ערים שתים עשרה  {ס}
Jos 21:8 ח ויתנו בני ישראל ללוים את הערים האלה ואת מגרשיהן כאשר צוה יהוה ביד משה בגורל  {פ}
Jos 21:9 ט ויתנו ממטה בני יהודה וממטה בני שמעון--את הערים האלה אשר יקרא אתהן בשם
Jos 21:10 י ויהי לבני אהרן ממשפחות הקהתי מבני לוי  כי להם היה הגורל ראישנה
Jos 21:11 יא ויתנו להם את קרית ארבע אבי הענוק היא חברון--בהר יהודה ואת מגרשה סביבתיה
Jos 21:12 יב ואת שדה העיר ואת חצריה נתנו לכלב בן יפנה באחזתו  {ס}
Jos 21:13 יג ולבני אהרן הכהן נתנו את עיר מקלט הרצח--את חברון ואת מגרשה ואת לבנה ואת מגרשה
Jos 21:14 יד ואת יתר ואת מגרשה ואת אשתמע ואת מגרשה
Jos 21:15 טו ואת חלן ואת מגרשה ואת דבר ואת מגרשה
Jos 21:16 טז ואת עין ואת מגרשה ואת יטה ואת מגרשה את בית שמש ואת מגרשה  ערים תשע--מאת שני השבטים האלה  {ס}
Jos 21:17 יז וממטה בנימין את גבעון ואת מגרשה את גבע ואת מגרשה
Jos 21:18 יח את ענתות ואת מגרשה ואת עלמון ואת מגרשה  ערים ארבע
Jos 21:19 יט כל ערי בני אהרן הכהנים--שלש עשרה ערים ומגרשיהן  {ס}
Jos 21:20 כ ולמשפחות בני קהת הלוים הנותרים מבני קהת ויהי ערי גורלם ממטה אפרים
Jos 21:21 כא ויתנו להם את עיר מקלט הרצח את שכם ואת מגרשה--בהר אפרים ואת גזר ואת מגרשה
Jos 21:22 כב ואת קבצים ואת מגרשה ואת בית חורן ואת מגרשה  ערים ארבע  {ס}
Jos 21:23 כג וממטה דן--את אלתקא ואת מגרשה את גבתון ואת מגרשה
Jos 21:24 כד את אילון ואת מגרשה את גת רמון ואת מגרשה  ערים ארבע
Jos 21:25 כה וממחצית מטה מנשה--את תענך ואת מגרשה ואת גת רמון ואת מגרשה  ערים שתים
Jos 21:26 כו כל ערים עשר ומגרשיהן למשפחות בני קהת הנותרים  {ס}
Jos 21:27 כז ולבני גרשון ממשפחת הלוים--מחצי מטה מנשה את עיר מקלט הרצח את גלון (גולן) בבשן ואת מגרשה ואת בעשתרה ואת מגרשה  ערים שתים  {ס}
Jos 21:28 כח וממטה יששכר את קשיון ואת מגרשה את דברת ואת מגרשה
Jos 21:29 כט את ירמות ואת מגרשה את עין גנים ואת מגרשה  ערים ארבע  {ס}
Jos 21:30 ל וממטה אשר את משאל ואת מגרשה את עבדון ואת מגרשה
Jos 21:31 לא את חלקת ואת מגרשה ואת רחב ואת מגרשה  ערים ארבע  {ס}
Jos 21:32 לב וממטה נפתלי את עיר מקלט הרצח את קדש בגליל ואת מגרשה ואת חמת דאר ואת מגרשה ואת קרתן ואת מגרשה  ערים שלש
Jos 21:33 לג כל ערי הגרשני למשפחתם--שלש עשרה עיר ומגרשיהן  {ס}
Jos 21:34 לד ולמשפחות בני מררי הלוים הנותרים--מאת מטה זבולן את יקנעם ואת מגרשה את קרתה ואת מגרשה
Jos 21:35 לה את דמנה ואת מגרשה את נהלל ואת מגרשה  ערים ארבע  {ס}
Jos 21:36 לו וממטה גד את עיר מקלט הרצח את רמת בגלעד ואת מגרשה ואת מחנים ואת מגרשה
Jos 21:37 לז את חשבון ואת מגרשה את יעזר ואת מגרשה  כל ערים ארבע
Jos 21:38 לח כל הערים לבני מררי למשפחתם הנותרים ממשפחות הלוים ויהי גורלם--ערים שתים עשרה
Jos 21:39 לט כל ערי הלוים בתוך אחזת בני ישראל--ערים ארבעים ושמנה ומגרשיהן
Jos 21:40 מ תהיינה הערים האלה--עיר עיר ומגרשיה סביבתיה  כן לכל הערים האלה  {ס}
Jos 21:41 מא ויתן יהוה לישראל את כל הארץ אשר נשבע לתת לאבותם וירשוה וישבו בה
Jos 21:42 מב וינח יהוה להם מסביב ככל אשר נשבע לאבותם ולא עמד איש בפניהם מכל איביהם--את כל איביהם נתן יהוה בידם
Jos 21:43 מג לא נפל דבר--מכל הדבר הטוב אשר דבר יהוה אל בית ישראל  הכל בא  {פ}
Jos 21:44
Jos 21:45