Jos 15:1 א ויהי הגורל למטה בני יהודה--למשפחתם  אל גבול אדום מדבר צן נגבה מקצה תימן
Jos 15:2 ב ויהי להם גבול נגב מקצה ים המלח מן הלשן הפנה נגבה
Jos 15:3 ג ויצא אל מנגב למעלה עקרבים ועבר צנה ועלה מנגב לקדש ברנע ועבר חצרון ועלה אדרה ונסב הקרקעה
Jos 15:4 ד ועבר עצמונה ויצא נחל מצרים והיה (והיו) תצאות הגבול ימה זה יהיה לכם גבול נגב
Jos 15:5 ה וגבול קדמה ים המלח עד קצה הירדן וגבול לפאת צפונה מלשון הים מקצה הירדן
Jos 15:6 ו ועלה הגבול בית חגלה ועבר מצפון לבית הערבה ועלה הגבול אבן בהן בן ראובן
Jos 15:7 ז ועלה הגבול דברה מעמק עכור וצפונה פנה אל הגלגל אשר נכח למעלה אדמים אשר מנגב לנחל ועבר הגבול אל מי עין שמש והיו תצאתיו אל עין רגל
Jos 15:8 ח ועלה הגבול גי בן הנם אל כתף היבוסי מנגב--היא ירושלם ועלה הגבול אל ראש ההר אשר על פני גי הנם ימה אשר בקצה עמק רפאים צפונה
Jos 15:9 ט ותאר הגבול מראש ההר אל מעין מי נפתוח ויצא אל ערי הר עפרון ותאר הגבול בעלה היא קרית יערים
Jos 15:10 י ונסב הגבול מבעלה ימה אל הר שעיר ועבר אל כתף הר יערים מצפונה היא כסלון וירד בית שמש ועבר תמנה
Jos 15:11 יא ויצא הגבול אל כתף עקרון צפונה ותאר הגבול שכרונה ועבר הר הבעלה ויצא יבנאל והיו תצאות הגבול ימה
Jos 15:12 יב וגבול ים הימה הגדול וגבול זה גבול בני יהודה סביב--למשפחתם
Jos 15:13 יג ולכלב בן יפנה נתן חלק בתוך בני יהודה אל פי יהוה ליהושע--את קרית ארבע אבי הענק היא חברון
Jos 15:14 יד וירש משם כלב את שלושה בני הענק--את ששי ואת אחימן ואת תלמי ילידי הענק
Jos 15:15 טו ויעל משם אל ישבי דבר ושם דבר לפנים קרית ספר
Jos 15:16 טז ויאמר כלב אשר יכה את קרית ספר ולכדה--ונתתי לו את עכסה בתי לאשה
Jos 15:17 יז וילכדה עתניאל בן קנז אחי כלב ויתן לו את עכסה בתו לאשה
Jos 15:18 יח ויהי בבואה ותסיתהו לשאול מאת אביה שדה ותצנח מעל החמור ויאמר לה כלב מה לך
Jos 15:19 יט ותאמר תנה לי ברכה כי ארץ הנגב נתתני ונתתה לי גלת מים ויתן לה את גלת עליות ואת גלת תחתיות  {פ}
Jos 15:20 כ זאת נחלת מטה בני יהודה--למשפחתם
Jos 15:21 כא ויהיו הערים מקצה למטה בני יהודה אל גבול אדום בנגבה--קבצאל ועדר ויגור
Jos 15:22 כב וקינה ודימונה ועדעדה
Jos 15:23 כג וקדש וחצור ויתנן
Jos 15:24 כד זיף וטלם ובעלות
Jos 15:25 כה וחצור חדתה וקריות חצרון היא חצור
Jos 15:26 כו אמם ושמע ומולדה
Jos 15:27 כז וחצר גדה וחשמון ובית פלט
Jos 15:28 כח וחצר שועל ובאר שבע ובזיותיה
Jos 15:29 כט בעלה ועיים ועצם
Jos 15:30 ל ואלתולד וכסיל וחרמה
Jos 15:31 לא וצקלג ומדמנה וסנסנה
Jos 15:32 לב ולבאות ושלחים ועין ורמון  כל ערים עשרים ותשע וחצריהן  {ס}
Jos 15:33 לג בשפלה--אשתאול וצרעה ואשנה
Jos 15:34 לד וזנוח ועין גנים תפוח והעינם
Jos 15:35 לה ירמות ועדלם שוכה ועזקה
Jos 15:36 לו ושערים ועדיתים והגדרה וגדרתים  ערים ארבע עשרה וחצריהן  {ס}
Jos 15:37 לז צנן וחדשה ומגדל גד
Jos 15:38 לח ודלען והמצפה ויקתאל
Jos 15:39 לט לכיש ובצקת ועגלון
Jos 15:40 מ וכבון ולחמס וכתליש
Jos 15:41 מא וגדרות בית דגון ונעמה ומקדה  ערים שש עשרה וחצריהן  {ס}
Jos 15:42 מב לבנה ועתר ועשן
Jos 15:43 מג ויפתח ואשנה ונציב
Jos 15:44 מד וקעילה ואכזיב ומראשה  ערים תשע וחצריהן  {ס}
Jos 15:45 מה עקרון ובנתיה וחצריה
Jos 15:46 מו מעקרון וימה  כל אשר על יד אשדוד וחצריהן  {ס}
Jos 15:47 מז אשדוד בנותיה וחצריה עזה בנותיה וחצריה--עד נחל מצרים והים הגבול (הגדול) וגבול  {ס}
Jos 15:48 מח ובהר--שמיר ויתיר ושוכה
Jos 15:49 מט ודנה וקרית סנה היא דבר  {ס}
Jos 15:50 נ וענב ואשתמה וענים
Jos 15:51 נא וגשן וחלן וגלה  ערים אחת עשרה וחצריהן  {ס}
Jos 15:52 נב ארב ורומה ואשען
Jos 15:53 נג וינים (וינום) ובית תפוח ואפקה
Jos 15:54 נד וחמטה וקרית ארבע היא חברון--וציער  ערים תשע וחצריהן  {ס}
Jos 15:55 נה מעון כרמל וזיף ויוטה
Jos 15:56 נו ויזרעאל ויקדעם וזנוח
Jos 15:57 נז הקין גבעה ותמנה  ערים עשר וחצריהן  {ס}
Jos 15:58 נח חלחול בית צור וגדור
Jos 15:59 נט ומערת ובית ענות ואלתקן  ערים שש וחצריהן  {פ}
Jos 15:60 ס קרית בעל היא קרית יערים--והרבה  ערים שתים וחצריהן  {ס}
Jos 15:61 סא במדבר--בית הערבה מדין וסככה
Jos 15:62 סב והנבשן ועיר המלח ועין גדי  ערים שש וחצריהן
Jos 15:63 סג ואת היבוסי יושבי ירושלם לא יוכלו (יכלו) בני יהודה להורישם וישב היבוסי את בני יהודה בירושלם עד היום הזה  {פ}