Allepo, Joshua, Chapter 13

Jos 13:1 א ויהושע זקן בא בימים ויאמר יהוה אליו אתה זקנתה באת בימים והארץ נשארה הרבה מאד לרשתה
Jos 13:2 ב זאת הארץ הנשארת  כל גלילות הפלשתים וכל הגשורי
Jos 13:3 ג מן השיחור אשר על פני מצרים ועד גבול עקרון צפונה--לכנעני תחשב חמשת סרני פלשתים העזתי והאשדודי האשקלוני הגתי והעקרוני והעוים
Jos 13:4 ד מתימן כל ארץ הכנעני ומערה אשר לצידנים--עד אפקה  עד גבול האמרי
Jos 13:5 ה והארץ הגבלי וכל הלבנון מזרח השמש מבעל גד תחת הר חרמון--עד לבוא חמת
Jos 13:6 ו כל ישבי ההר מן הלבנון עד משרפת מים כל צידנים--אנכי אורישם מפני בני ישראל  רק הפלה לישראל בנחלה כאשר צויתיך
Jos 13:7 ז ועתה חלק את הארץ הזאת בנחלה--לתשעת השבטים וחצי השבט המנשה
Jos 13:8 ח עמו הראובני והגדי לקחו נחלתם--אשר נתן להם משה בעבר הירדן מזרחה כאשר נתן להם משה עבד יהוה
Jos 13:9 ט מערוער אשר על שפת נחל ארנון והעיר אשר בתוך הנחל וכל המישר מידבא--עד דיבון
Jos 13:10 י וכל ערי סיחון מלך האמרי אשר מלך בחשבון--עד גבול בני עמון
Jos 13:11 יא והגלעד וגבול הגשורי והמעכתי וכל הר חרמון וכל הבשן--עד סלכה
Jos 13:12 יב כל ממלכות עוג בבשן אשר מלך בעשתרות ובאדרעי  הוא נשאר מיתר הרפאים ויכם משה וירשם
Jos 13:13 יג ולא הורישו בני ישראל את הגשורי ואת המעכתי וישב גשור ומעכת בקרב ישראל עד היום הזה
Jos 13:14 יד רק לשבט הלוי לא נתן נחלה  אשי יהוה אלהי ישראל הוא נחלתו כאשר דבר לו  {פ}
Jos 13:15 טו ויתן משה למטה בני ראובן למשפחתם
Jos 13:16 טז ויהי להם הגבול מערוער אשר על שפת נחל ארנון והעיר אשר בתוך הנחל וכל המישר--על מידבא
Jos 13:17 יז חשבון וכל עריה אשר במישר דיבן ובמות בעל ובית בעל מעון
Jos 13:18 יח ויהצה וקדמת ומפעת
Jos 13:19 יט וקריתים ושבמה וצרת השחר בהר העמק
Jos 13:20 כ ובית פעור ואשדות הפסגה ובית הישמות
Jos 13:21 כא וכל ערי המישר וכל ממלכות סיחון מלך האמרי אשר מלך בחשבון  אשר הכה משה אתו ואת נשיאי מדין את אוי ואת רקם ואת צור ואת חור ואת רבע נסיכי סיחון ישבי הארץ
Jos 13:22 כב ואת בלעם בן בעור הקוסם--הרגו בני ישראל בחרב אל חלליהם
Jos 13:23 כג ויהי גבול בני ראובן--הירדן וגבול  זאת נחלת בני ראובן למשפחותם הערים וחצריהן  {פ}
Jos 13:24 כד ויתן משה למטה גד לבני גד למשפחתם
Jos 13:25 כה ויהי להם הגבול--יעזר וכל ערי הגלעד וחצי ארץ בני עמון  עד ערוער אשר על פני רבה
Jos 13:26 כו ומחשבון עד רמת המצפה ובטנים וממחנים עד גבול לדבר
Jos 13:27 כז ובעמק בית הרם ובית נמרה וסכות וצפון יתר ממלכות סיחון מלך חשבון הירדן וגבל--עד קצה ים כנרת עבר הירדן מזרחה
Jos 13:28 כח זאת נחלת בני גד למשפחתם הערים וחצריהם  {ס}
Jos 13:29 כט ויתן משה לחצי שבט מנשה ויהי לחצי מטה בני מנשה--למשפחותם
Jos 13:30 ל ויהי גבולם ממחנים כל הבשן כל ממלכות עוג מלך הבשן וכל חות יאיר אשר בבשן--ששים עיר
Jos 13:31 לא וחצי הגלעד ועשתרות ואדרעי ערי ממלכות עוג בבשן לבני מכיר בן מנשה לחצי בני מכיר למשפחותם
Jos 13:32 לב אלה אשר נחל משה בערבות מואב מעבר לירדן יריחו מזרחה  {פ}
Jos 13:33 לג ולשבט הלוי--לא נתן משה נחלה  יהוה אלהי ישראל הוא נחלתם כאשר דבר להם  {ס}