Deut 33:1 א וזאת הברכה אשר ברך משה איש האלהים--את בני ישראל  לפני מותו
Deut 33:2 ב ויאמר יהוה מסיני בא וזרח משעיר למו--הופיע מהר פארן ואתה מרבבת קדש מימינו אשדת (אש דת) למו
Deut 33:3 ג אף חבב עמים כל קדשיו בידך והם תכו לרגלך ישא מדברתיך
Deut 33:4 ד תורה צוה לנו משה  מורשה קהלת יעקב
Deut 33:5 ה ויהי בישרון מלך בהתאסף ראשי עם יחד שבטי ישראל
Deut 33:6 ו יחי ראובן ואל ימת ויהי מתיו מספר  {ס}
Deut 33:7 ז וזאת ליהודה ויאמר שמע יהוה קול יהודה ואל עמו תביאנו ידיו רב לו ועזר מצריו תהיה  {פ}
Deut 33:8 ח וללוי אמר תמיך ואוריך לאיש חסידך אשר נסיתו במסה תריבהו על מי מריבה
Deut 33:9 ט האמר לאביו ולאמו לא ראיתיו ואת אחיו לא הכיר ואת בנו לא ידע  כי שמרו אמרתך ובריתך ינצרו
Deut 33:10 י יורו משפטיך ליעקב ותורתך לישראל ישימו קטורה באפך וכליל על מזבחך
Deut 33:11 יא ברך יהוה חילו ופעל ידיו תרצה מחץ מתנים קמיו ומשנאיו מן יקומון  {ס}
Deut 33:12 יב לבנימן אמר--ידיד יהוה ישכן לבטח עליו חפף עליו כל היום ובין כתפיו שכן  {ס}
Deut 33:13 יג וליוסף אמר מברכת יהוה ארצו ממגד שמים מטל ומתהום רבצת תחת
Deut 33:14 יד וממגד תבואת שמש וממגד גרש ירחים
Deut 33:15 טו ומראש הררי קדם וממגד גבעות עולם
Deut 33:16 טז וממגד ארץ ומלאה ורצון שכני סנה תבואתה לראש יוסף ולקדקד נזיר אחיו
Deut 33:17 יז בכור שורו הדר לו וקרני ראם קרניו--בהם עמים ינגח יחדו אפסי ארץ והם רבבות אפרים והם אלפי מנשה  {ס}
Deut 33:18 יח ולזבולן אמר שמח זבולן בצאתך ויששכר באהליך
Deut 33:19 יט עמים הר יקראו--שם יזבחו זבחי צדק  כי שפע ימים יינקו ושפני טמוני חול  {ס}
Deut 33:20 כ ולגד אמר ברוך מרחיב גד  כלביא שכן וטרף זרוע אף קדקד
Deut 33:21 כא וירא ראשית לו כי שם חלקת מחקק ספון ויתא ראשי עם--צדקת יהוה עשה ומשפטיו עם ישראל  {ס}
Deut 33:22 כב ולדן אמר דן גור אריה יזנק מן הבשן
Deut 33:23 כג ולנפתלי אמר--נפתלי שבע רצון ומלא ברכת יהוה ים ודרום ירשה  {ס}
Deut 33:24 כד ולאשר אמר ברוך מבנים אשר יהי רצוי אחיו וטבל בשמן רגלו
Deut 33:25 כה ברזל ונחשת מנעלך וכימיך דבאך
Deut 33:26 כו אין כאל ישרון  רכב שמים בעזרך ובגאותו שחקים
Deut 33:27 כז מענה אלהי קדם ומתחת זרעת עולם ויגרש מפניך אויב ויאמר השמד
Deut 33:28 כח וישכן ישראל בטח בדד עין יעקב אל ארץ דגן ותירוש אף שמיו יערפו טל
Deut 33:29 כט אשריך ישראל מי כמוך עם נושע ביהוה מגן עזרך ואשר חרב גאותך ויכחשו איביך לך ואתה על במותימו תדרך  {ס}