Deut 32:1 א האזינו השמים ואדברה  {ס}  ותשמע הארץ אמרי פי  {ר}
Deut 32:2 ב יערף כמטר לקחי  {ס}  תזל כטל אמרתי  {ר} כשעירם עלי דשא  {ס}  וכרביבים עלי עשב  {ר}
Deut 32:3 ג כי שם יהוה אקרא  {ס}  הבו גדל לאלהינו  {ר}
Deut 32:4 ד הצור תמים פעלו  {ס}  כי כל דרכיו משפט  {ר} אל אמונה ואין עול  {ס}  צדיק וישר הוא  {ר}
Deut 32:5 ה שחת לו לא בניו מומם  {ס}  דור עקש ופתלתל  {ר}
Deut 32:6 ו ה ליהוה תגמלו זאת--  {ס}  עם נבל ולא חכם  {ר} הלוא הוא אביך קנך  {ס}  הוא עשך ויכננך  {ר}
Deut 32:7 ז זכר ימות עולם בינו שנות דר ודר  {ס}  שאל אביך ויגדך זקניך ויאמרו לך  {ר}
Deut 32:8 ח בהנחל עליון גוים  {ס}  בהפרידו בני אדם  {ר} יצב גבלת עמים  {ס}  למספר בני ישראל  {ר}
Deut 32:9 ט כי חלק יהוה עמו  {ס}  יעקב חבל נחלתו  {ר}
Deut 32:10 י ימצאהו בארץ מדבר  {ס}  ובתהו ילל ישמן  {ר} יסבבנהו יבוננהו--  {ס}  יצרנהו כאישון עינו  {ר}
Deut 32:11 יא כנשר יעיר קנו על גוזליו ירחף  {ס}  יפרש כנפיו יקחהו ישאהו על אברתו  {ר}
Deut 32:12 יב יהוה בדד ינחנו  {ס}  ואין עמו אל נכר  {ר}
Deut 32:13 יג ירכבהו על במותי (במתי) ארץ  {ס}  ויאכל תנובת שדי  {ר} וינקהו דבש מסלע  {ס}  ושמן מחלמיש צור  {ר}
Deut 32:14 יד חמאת בקר וחלב צאן  {ס}  עם חלב כרים ואילים  {ר} בני בשן ועתודים  {ס}  עם חלב כליות חטה  {ר} ודם ענב תשתה חמר  {ס}
Deut 32:15 טו וישמן ישרון ויבעט  {ר} שמנת עבית כשית  {ס}  ויטש אלוה עשהו  {ר} וינבל צור ישעתו  {ס}
Deut 32:16 טז יקנאהו בזרים  {ר} בתועבת יכעיסהו  {ס}
Deut 32:17 יז יזבחו לשדים לא אלה--  {ר} אלהים לא ידעום  {ס}  חדשים מקרב באו  {ר} לא שערום אבתיכם  {ס}
Deut 32:18 יח צור ילדך תשי  {ר} ותשכח אל מחללך  {ס}
Deut 32:19 יט וירא יהוה וינאץ  {ר} מכעס בניו ובנתיו  {ס}
Deut 32:20 כ ויאמר אסתירה פני מהם--  {ר} אראה מה אחריתם  {ס}  כי דור תהפכת המה  {ר} בנים לא אמן בם  {ס}
Deut 32:21 כא הם קנאוני בלא אל  {ר} כעסוני בהבליהם  {ס}  ואני אקניאם בלא עם  {ר} בגוי נבל אכעיסם  {ס}
Deut 32:22 כב כי אש קדחה באפי  {ר} ותיקד עד שאול תחתית  {ס}  ותאכל ארץ ויבלה  {ר} ותלהט מוסדי הרים  {ס}
Deut 32:23 כג אספה עלימו רעות  {ר} חצי אכלה בם  {ס}
Deut 32:24 כד מזי רעב ולחמי רשף  {ר} וקטב מרירי  {ס}  ושן בהמת אשלח בם  {ר} עם חמת זחלי עפר  {ס}
Deut 32:25 כה מחוץ תשכל חרב ומחדרים אימה גם בחור  {ר} גם בתולה--יונק עם איש שיבה  {ס}
Deut 32:26 כו אמרתי אפאיהם  {ר} אשביתה מאנוש זכרם  {ס}
Deut 32:27 כז לולי כעס אויב אגור--  {ר} פן ינכרו צרימו  {ס}  פן יאמרו ידנו רמה  {ר} ולא יהוה פעל כל זאת  {ס}
Deut 32:28 כח כי גוי אבד עצות המה  {ר} ואין בהם תבונה  {ס}
Deut 32:29 כט לו חכמו ישכילו זאת  {ר} יבינו לאחריתם  {ס}
Deut 32:30 ל איכה ירדף אחד אלף  {ר} ושנים יניסו רבבה  {ס}  אם לא כי צורם מכרם  {ר} ויהוה הסגירם  {ס}
Deut 32:31 לא כי לא כצורנו צורם  {ר} ואיבינו פלילים  {ס}
Deut 32:32 לב כי מגפן סדם גפנם  {ר} ומשדמת עמרה  {ס}  ענבמו ענבי רוש--  {ר} אשכלת מררת למו  {ס}
Deut 32:33 לג חמת תנינם יינם  {ר} וראש פתנים אכזר  {ס}
Deut 32:34 לד הלא הוא כמס עמדי  {ר} חתום באוצרתי  {ס}
Deut 32:35 לה לי נקם ושלם  {ר} לעת תמוט רגלם  {ס}  כי קרוב יום אידם  {ר} וחש עתדת למו  {ס}
Deut 32:36 לו כי ידין יהוה עמו  {ר} ועל עבדיו יתנחם  {ס}  כי יראה כי אזלת יד  {ר} ואפס עצור ועזוב  {ס}
Deut 32:37 לז ואמר אי אלהימו--  {ר} צור חסיו בו  {ס}
Deut 32:38 לח אשר חלב זבחימו יאכלו  {ר} ישתו יין נסיכם  {ס}  יקומו ויעזרכם--  {ר} יהי עליכם סתרה  {ס}
Deut 32:39 לט ראו עתה כי אני אני הוא  {ר} ואין אלהים עמדי  {ס}  אני אמית ואחיה  {ר} מחצתי ואני ארפא  {ס}  ואין מידי מציל  {ר}
Deut 32:40 מ כי אשא אל שמים ידי  {ס}  ואמרתי חי אנכי לעלם  {ר}
Deut 32:41 מא אם שנותי ברק חרבי  {ס}  ותאחז במשפט ידי  {ר} אשיב נקם לצרי  {ס}  ולמשנאי אשלם  {ר}
Deut 32:42 מב אשכיר חצי מדם  {ס}  וחרבי תאכל בשר  {ר} מדם חלל ושביה  {ס}  מראש פרעות אויב  {ר}
Deut 32:43 מג הרנינו גוים עמו  {ס}  כי דם עבדיו יקום  {ר} ונקם ישיב לצריו  {ס}  וכפר אדמתו עמו  {ר} {ש}
Deut 32:44 מד ויבא משה וידבר את כל דברי השירה הזאת--באזני העם  הוא והושע בן נון
Deut 32:45 מה ויכל משה לדבר את כל הדברים האלה--אל כל ישראל
Deut 32:46 מו ויאמר אלהם שימו לבבכם לכל הדברים אשר אנכי מעיד בכם היום  אשר תצום את בניכם לשמר לעשות את כל דברי התורה הזאת
Deut 32:47 מז כי לא דבר רק הוא מכם--כי הוא חייכם ובדבר הזה תאריכו ימים על האדמה אשר אתם עברים את הירדן שמה לרשתה  {פ}
Deut 32:48 מח וידבר יהוה אל משה בעצם היום הזה לאמר
Deut 32:49 מט עלה אל הר העברים הזה הר נבו אשר בארץ מואב אשר על פני ירחו וראה את ארץ כנען אשר אני נתן לבני ישראל לאחזה
Deut 32:50 נ ומת בהר אשר אתה עלה שמה והאסף אל עמיך  כאשר מת אהרן אחיך בהר ההר ויאסף אל עמיו
Deut 32:51 נא על אשר מעלתם בי בתוך בני ישראל במי מריבת קדש מדבר צן--על אשר לא קדשתם אותי בתוך בני ישראל
Deut 32:52 נב כי מנגד תראה את הארץ ושמה לא תבוא--אל הארץ אשר אני נתן לבני ישראל  {פ}