Deut 27:1 א ויצו משה וזקני ישראל את העם לאמר  שמר את כל המצוה אשר אנכי מצוה אתכם היום
Deut 27:2 ב והיה ביום אשר תעברו את הירדן אל הארץ אשר יהוה אלהיך נתן לך--והקמת לך אבנים גדלות ושדת אתם בשיד
Deut 27:3 ג וכתבת עליהן את כל דברי התורה הזאת--בעברך  למען אשר תבא אל הארץ אשר יהוה אלהיך נתן לך ארץ זבת חלב ודבש כאשר דבר יהוה אלהי אבתיך לך
Deut 27:4 ד והיה בעברכם את הירדן תקימו את האבנים האלה אשר אנכי מצוה אתכם היום בהר עיבל ושדת אותם בשיד
Deut 27:5 ה ובנית שם מזבח ליהוה אלהיך  מזבח אבנים לא תניף עליהם ברזל
Deut 27:6 ו אבנים שלמות תבנה את מזבח יהוה אלהיך והעלית עליו עולת ליהוה אלהיך
Deut 27:7 ז וזבחת שלמים ואכלת שם ושמחת לפני יהוה אלהיך
Deut 27:8 ח וכתבת על האבנים את כל דברי התורה הזאת--באר היטב  {ס}
Deut 27:9 ט וידבר משה והכהנים הלוים אל כל ישראל לאמר  הסכת ושמע ישראל היום הזה נהיית לעם ליהוה אלהיך
Deut 27:10 י ושמעת בקול יהוה אלהיך ועשית את מצותו ואת חקיו אשר אנכי מצוך היום  {ס}
Deut 27:11 יא ויצו משה את העם ביום ההוא לאמר
Deut 27:12 יב אלה יעמדו לברך את העם על הר גרזים בעברכם את הירדן  שמעון ולוי ויהודה ויששכר ויוסף ובנימן
Deut 27:13 יג ואלה יעמדו על הקללה בהר עיבל  ראובן גד ואשר וזבולן דן ונפתלי
Deut 27:14 יד וענו הלוים ואמרו אל כל איש ישראל--קול רם  {ס}
Deut 27:15 טו ארור האיש אשר יעשה פסל ומסכה תועבת יהוה מעשה ידי חרש--ושם בסתר וענו כל העם ואמרו אמן  {ס}
Deut 27:16 טז ארור מקלה אביו ואמו ואמר כל העם אמן  {ס}
Deut 27:17 יז ארור מסיג גבול רעהו ואמר כל העם אמן  {ס}
Deut 27:18 יח ארור משגה עור בדרך ואמר כל העם אמן  {ס}
Deut 27:19 יט ארור מטה משפט גר יתום--ואלמנה ואמר כל העם אמן
Deut 27:20 כ ארור שכב עם אשת אביו--כי גלה כנף אביו ואמר כל העם אמן  {ס}
Deut 27:21 כא ארור שכב עם כל בהמה ואמר כל העם אמן  {ס}
Deut 27:22 כב ארור שכב עם אחתו--בת אביו או בת אמו ואמר כל העם אמן  {ס}
Deut 27:23 כג ארור שכב עם חתנתו ואמר כל העם אמן  {ס}
Deut 27:24 כד ארור מכה רעהו בסתר ואמר כל העם אמן  {ס}
Deut 27:25 כה ארור לקח שחד להכות נפש דם נקי ואמר כל העם אמן  {ס}
Deut 27:26 כו ארור אשר לא יקים את דברי התורה הזאת--לעשות אותם ואמר כל העם אמן  {פ}