Allepo, Deuteronomy, Chapter 25

Deut 25:1 א כי יהיה ריב בין אנשים ונגשו אל המשפט ושפטום והצדיקו את הצדיק והרשיעו את הרשע
Deut 25:2 ב והיה אם בן הכות הרשע--והפילו השפט והכהו לפניו כדי רשעתו במספר
Deut 25:3 ג ארבעים יכנו לא יסיף  פן יסיף להכתו על אלה מכה רבה ונקלה אחיך לעיניך
Deut 25:4 ד לא תחסם שור בדישו  {ס}
Deut 25:5 ה כי ישבו אחים יחדו ומת אחד מהם ובן אין לו--לא תהיה אשת המת החוצה לאיש זר  יבמה יבא עליה ולקחה לו לאשה ויבמה
Deut 25:6 ו והיה הבכור אשר תלד--יקום על שם אחיו המת ולא ימחה שמו מישראל
Deut 25:7 ז ואם לא יחפץ האיש לקחת את יבמתו ועלתה יבמתו השערה אל הזקנים ואמרה מאן יבמי להקים לאחיו שם בישראל--לא אבה יבמי
Deut 25:8 ח וקראו לו זקני עירו ודברו אליו ועמד ואמר לא חפצתי לקחתה
Deut 25:9 ט ונגשה יבמתו אליו לעיני הזקנים וחלצה נעלו מעל רגלו וירקה בפניו וענתה ואמרה ככה יעשה לאיש אשר לא יבנה את בית אחיו
Deut 25:10 י ונקרא שמו בישראל  בית חלוץ הנעל  {ס}
Deut 25:11 יא כי ינצו אנשים יחדו איש ואחיו וקרבה אשת האחד להציל את אישה מיד מכהו ושלחה ידה והחזיקה במבשיו
Deut 25:12 יב וקצתה את כפה  לא תחוס עינך  {ס}
Deut 25:13 יג לא יהיה לך בכיסך אבן ואבן  גדולה וקטנה
Deut 25:14 יד לא יהיה לך בביתך איפה ואיפה  גדולה וקטנה
Deut 25:15 טו אבן שלמה וצדק יהיה לך איפה שלמה וצדק יהיה לך--למען יאריכו ימיך על האדמה אשר יהוה אלהיך נתן לך
Deut 25:16 טז כי תועבת יהוה אלהיך כל עשה אלה  כל עשה עול  {פ}
Deut 25:17 יז זכור את אשר עשה לך עמלק בדרך בצאתכם ממצרים
Deut 25:18 יח אשר קרך בדרך ויזנב בך כל הנחשלים אחריך--ואתה עיף ויגע ולא ירא אלהים
Deut 25:19 יט והיה בהניח יהוה אלהיך לך מכל איביך מסביב בארץ אשר יהוה אלהיך נתן לך נחלה לרשתה--תמחה את זכר עמלק מתחת השמים לא תשכח  {פ}