Deut 22:1 א לא תראה את שור אחיך או את שיו נדחים והתעלמת מהם  השב תשיבם לאחיך
Deut 22:2 ב ואם לא קרוב אחיך אליך ולא ידעתו--ואספתו אל תוך ביתך והיה עמך עד דרש אחיך אתו והשבתו לו
Deut 22:3 ג וכן תעשה לחמרו וכן תעשה לשמלתו וכן תעשה לכל אבדת אחיך אשר תאבד ממנו ומצאתה  לא תוכל להתעלם  {ס}
Deut 22:4 ד לא תראה את חמור אחיך או שורו נפלים בדרך והתעלמת מהם  הקם תקים עמו  {ס}
Deut 22:5 ה לא יהיה כלי גבר על אשה ולא ילבש גבר שמלת אשה  כי תועבת יהוה אלהיך כל עשה אלה  {פ}
Deut 22:6 ו כי יקרא קן צפור לפניך בדרך בכל עץ או על הארץ אפרחים או ביצים והאם רבצת על האפרחים או על הביצים--לא תקח האם על הבנים
Deut 22:7 ז שלח תשלח את האם ואת הבנים תקח לך למען ייטב לך והארכת ימים  {ס}
Deut 22:8 ח כי תבנה בית חדש ועשית מעקה לגגך ולא תשים דמים בביתך כי יפל הנפל ממנו
Deut 22:9 ט לא תזרע כרמך כלאים  פן תקדש המלאה הזרע אשר תזרע ותבואת הכרם  {ס}
Deut 22:10 י לא תחרש בשור ובחמר יחדו
Deut 22:11 יא לא תלבש שעטנז צמר ופשתים יחדו  {ס}
Deut 22:12 יב גדלים תעשה לך על ארבע כנפות כסותך אשר תכסה בה  {ס}
Deut 22:13 יג כי יקח איש אשה ובא אליה ושנאה
Deut 22:14 יד ושם לה עלילת דברים והוצא עליה שם רע ואמר את האשה הזאת לקחתי ואקרב אליה ולא מצאתי לה בתולים
Deut 22:15 טו ולקח אבי הנער ואמה והוציאו את בתולי הנער אל זקני העיר--השערה
Deut 22:16 טז ואמר אבי הנער אל הזקנים  את בתי נתתי לאיש הזה לאשה--וישנאה
Deut 22:17 יז והנה הוא שם עלילת דברים לאמר לא מצאתי לבתך בתולים ואלה בתולי בתי ופרשו השמלה לפני זקני העיר
Deut 22:18 יח ולקחו זקני העיר ההוא את האיש ויסרו אתו
Deut 22:19 יט וענשו אתו מאה כסף ונתנו לאבי הנערה--כי הוציא שם רע על בתולת ישראל ולו תהיה לאשה לא יוכל לשלחה כל ימיו  {ס}
Deut 22:20 כ ואם אמת היה הדבר הזה  לא נמצאו בתולים לנער
Deut 22:21 כא והוציאו את הנער אל פתח בית אביה וסקלוה אנשי עירה באבנים ומתה--כי עשתה נבלה בישראל לזנות בית אביה ובערת הרע מקרבך  {ס}
Deut 22:22 כב כי ימצא איש שכב עם אשה בעלת בעל ומתו גם שניהם--האיש השכב עם האשה והאשה ובערת הרע מישראל  {ס}
Deut 22:23 כג כי יהיה נער בתולה מארשה לאיש ומצאה איש בעיר ושכב עמה
Deut 22:24 כד והוצאתם את שניהם אל שער העיר ההוא וסקלתם אתם באבנים ומתו--את הנער על דבר אשר לא צעקה בעיר ואת האיש על דבר אשר ענה את אשת רעהו ובערת הרע מקרבך  {ס}
Deut 22:25 כה ואם בשדה ימצא האיש את הנער המארשה והחזיק בה האיש ושכב עמה  ומת האיש אשר שכב עמה--לבדו
Deut 22:26 כו ולנער לא תעשה דבר אין לנער חטא מות  כי כאשר יקום איש על רעהו ורצחו נפש--כן הדבר הזה
Deut 22:27 כז כי בשדה מצאה צעקה הנער המארשה ואין מושיע לה  {ס}
Deut 22:28 כח כי ימצא איש נער בתולה אשר לא ארשה ותפשה ושכב עמה ונמצאו
Deut 22:29 כט ונתן האיש השכב עמה לאבי הנער--חמשים כסף ולו תהיה לאשה תחת אשר ענה--לא יוכל שלחה כל ימיו  {ס}
Deut 22:30