Deut 14:1 א בנים אתם ליהוה אלהיכם  לא תתגדדו ולא תשימו קרחה בין עיניכם--למת
Deut 14:2 ב כי עם קדוש אתה ליהוה אלהיך ובך בחר יהוה להיות לו לעם סגלה מכל העמים אשר על פני האדמה  {ס}
Deut 14:3 ג לא תאכל כל תועבה
Deut 14:4 ד זאת הבהמה אשר תאכלו  שור שה כשבים ושה עזים
Deut 14:5 ה איל וצבי ויחמור ואקו ודישן ותאו וזמר
Deut 14:6 ו וכל בהמה מפרסת פרסה ושסעת שסע שתי פרסות מעלת גרה בבהמה--אתה תאכלו
Deut 14:7 ז אך את זה לא תאכלו ממעלי הגרה וממפריסי הפרסה השסועה  את הגמל ואת הארנבת ואת השפן כי מעלה גרה המה ופרסה לא הפריסו--טמאים הם לכם
Deut 14:8 ח ואת החזיר כי מפריס פרסה הוא ולא גרה--טמא הוא לכם מבשרם לא תאכלו ובנבלתם לא תגעו  {ס}
Deut 14:9 ט את זה תאכלו מכל אשר במים  כל אשר לו סנפיר וקשקשת תאכלו
Deut 14:10 י וכל אשר אין לו סנפיר וקשקשת לא תאכלו--טמא הוא לכם  {ס}
Deut 14:11 יא כל צפור טהרה תאכלו
Deut 14:12 יב וזה אשר לא תאכלו מהם  הנשר והפרס והעזניה
Deut 14:13 יג והראה ואת האיה והדיה למינה
Deut 14:14 יד ואת כל ערב למינו
Deut 14:15 טו ואת בת היענה ואת התחמס ואת השחף ואת הנץ למינהו
Deut 14:16 טז את הכוס ואת הינשוף והתנשמת
Deut 14:17 יז והקאת ואת הרחמה ואת השלך
Deut 14:18 יח והחסידה והאנפה למינה והדוכיפת והעטלף
Deut 14:19 יט וכל שרץ העוף טמא הוא לכם  לא יאכלו
Deut 14:20 כ כל עוף טהור תאכלו
Deut 14:21 כא לא תאכלו כל נבלה לגר אשר בשעריך תתננה ואכלה או מכר לנכרי--כי עם קדוש אתה ליהוה אלהיך לא תבשל גדי בחלב אמו  {פ}
Deut 14:22 כב עשר תעשר את כל תבואת זרעך היצא השדה שנה שנה
Deut 14:23 כג ואכלת לפני יהוה אלהיך במקום אשר יבחר לשכן שמו שם מעשר דגנך תירשך ויצהרך ובכרת בקרך וצאנך  למען תלמד ליראה את יהוה אלהיך--כל הימים
Deut 14:24 כד וכי ירבה ממך הדרך כי לא תוכל שאתו--כי ירחק ממך המקום אשר יבחר יהוה אלהיך לשום שמו שם  כי יברכך יהוה אלהיך
Deut 14:25 כה ונתתה בכסף וצרת הכסף בידך והלכת אל המקום אשר יבחר יהוה אלהיך בו
Deut 14:26 כו ונתתה הכסף בכל אשר תאוה נפשך בבקר ובצאן וביין ובשכר ובכל אשר תשאלך נפשך ואכלת שם לפני יהוה אלהיך ושמחת אתה וביתך
Deut 14:27 כז והלוי אשר בשעריך לא תעזבנו  כי אין לו חלק ונחלה עמך  {ס}
Deut 14:28 כח מקצה שלש שנים תוציא את כל מעשר תבואתך בשנה ההוא והנחת בשעריך
Deut 14:29 כט ובא הלוי כי אין לו חלק ונחלה עמך והגר והיתום והאלמנה אשר בשעריך ואכלו ושבעו--למען יברכך יהוה אלהיך בכל מעשה ידך אשר תעשה  {ס}