Deut 6:1 א וזאת המצוה החקים והמשפטים אשר צוה יהוה אלהיכם ללמד אתכם--לעשות בארץ אשר אתם עברים שמה לרשתה
Deut 6:2 ב למען תירא את יהוה אלהיך לשמר את כל חקתיו ומצותיו אשר אנכי מצוך אתה ובנך ובן בנך כל ימי חייך--ולמען יארכן ימיך
Deut 6:3 ג ושמעת ישראל ושמרת לעשות אשר ייטב לך ואשר תרבון מאד  כאשר דבר יהוה אלהי אבתיך לך--ארץ זבת חלב ודבש  {פ}
Deut 6:4 ד שמע ישראל  יהוה אלהינו יהוה אחד
Deut 6:5 ה ואהבת את יהוה אלהיך בכל לבבך ובכל נפשך ובכל מאדך
Deut 6:6 ו והיו הדברים האלה אשר אנכי מצוך היום--על לבבך
Deut 6:7 ז ושננתם לבניך ודברת בם בשבתך בביתך ובלכתך בדרך ובשכבך ובקומך
Deut 6:8 ח וקשרתם לאות על ידך והיו לטטפת בין עיניך
Deut 6:9 ט וכתבתם על מזזות ביתך ובשעריך  {ס}
Deut 6:10 י והיה כי יביאך יהוה אלהיך אל הארץ אשר נשבע לאבתיך לאברהם ליצחק וליעקב--לתת לך  ערים גדלת וטבת אשר לא בנית
Deut 6:11 יא ובתים מלאים כל טוב אשר לא מלאת וברת חצובים אשר לא חצבת כרמים וזיתים אשר לא נטעת ואכלת ושבעת
Deut 6:12 יב השמר לך פן תשכח את יהוה אשר הוציאך מארץ מצרים מבית עבדים
Deut 6:13 יג את יהוה אלהיך תירא ואתו תעבד ובשמו תשבע
Deut 6:14 יד לא תלכון אחרי אלהים אחרים--מאלהי העמים אשר סביבותיכם
Deut 6:15 טו כי אל קנא יהוה אלהיך בקרבך  פן יחרה אף יהוה אלהיך בך והשמידך מעל פני האדמה  {ס}
Deut 6:16 טז לא תנסו את יהוה אלהיכם כאשר נסיתם במסה
Deut 6:17 יז שמור תשמרון את מצות יהוה אלהיכם ועדתיו וחקיו אשר צוך
Deut 6:18 יח ועשית הישר והטוב בעיני יהוה--למען ייטב לך ובאת וירשת את הארץ הטבה אשר נשבע יהוה לאבתיך
Deut 6:19 יט להדף את כל איביך מפניך כאשר דבר יהוה  {ס}
Deut 6:20 כ כי ישאלך בנך מחר לאמר  מה העדת והחקים והמשפטים אשר צוה יהוה אלהינו אתכם
Deut 6:21 כא ואמרת לבנך עבדים היינו לפרעה במצרים ויציאנו יהוה ממצרים ביד חזקה
Deut 6:22 כב ויתן יהוה אותת ומפתים גדלים ורעים במצרים בפרעה ובכל ביתו--לעינינו
Deut 6:23 כג ואותנו הוציא משם--למען הביא אתנו לתת לנו את הארץ אשר נשבע לאבתינו
Deut 6:24 כד ויצונו יהוה לעשות את כל החקים האלה ליראה את יהוה אלהינו--לטוב לנו כל הימים לחיתנו כהיום הזה
Deut 6:25 כה וצדקה תהיה לנו  כי נשמר לעשות את כל המצוה הזאת לפני יהוה אלהינו--כאשר צונו  {ס}