Num 35:1 א וידבר יהוה אל משה בערבת מואב על ירדן ירחו לאמר
Num 35:2 ב צו את בני ישראל ונתנו ללוים מנחלת אחזתם ערים לשבת ומגרש לערים סביבתיהם תתנו ללוים
Num 35:3 ג והיו הערים להם לשבת ומגרשיהם יהיו לבהמתם ולרכשם ולכל חיתם
Num 35:4 ד ומגרשי הערים אשר תתנו ללוים--מקיר העיר וחוצה אלף אמה סביב
Num 35:5 ה ומדתם מחוץ לעיר את פאת קדמה אלפים באמה ואת פאת נגב אלפים באמה ואת פאת ים אלפים באמה ואת פאת צפון אלפים באמה--והעיר בתוך זה יהיה להם מגרשי הערים
Num 35:6 ו ואת הערים אשר תתנו ללוים--את שש ערי המקלט אשר תתנו לנס שמה הרצח ועליהם תתנו ארבעים ושתים עיר
Num 35:7 ז כל הערים אשר תתנו ללוים--ארבעים ושמנה עיר  אתהן ואת מגרשיהן
Num 35:8 ח והערים אשר תתנו מאחזת בני ישראל--מאת הרב תרבו ומאת המעט תמעיטו  איש כפי נחלתו אשר ינחלו יתן מעריו ללוים  {פ}
Num 35:9 ט וידבר יהוה אל משה לאמר
Num 35:10 י דבר אל בני ישראל ואמרת אלהם  כי אתם עברים את הירדן ארצה כנען
Num 35:11 יא והקריתם לכם ערים ערי מקלט תהיינה לכם ונס שמה רצח מכה נפש בשגגה
Num 35:12 יב והיו לכם הערים למקלט מגאל ולא ימות הרצח עד עמדו לפני העדה למשפט
Num 35:13 יג והערים אשר תתנו--שש ערי מקלט תהיינה לכם
Num 35:14 יד את שלש הערים תתנו מעבר לירדן ואת שלש הערים תתנו בארץ כנען  ערי מקלט תהיינה
Num 35:15 טו לבני ישראל ולגר ולתושב בתוכם תהיינה שש הערים האלה למקלט--לנוס שמה כל מכה נפש בשגגה
Num 35:16 טז ואם בכלי ברזל הכהו וימת רצח הוא  מות יומת הרצח
Num 35:17 יז ואם באבן יד אשר ימות בה הכהו וימת--רצח הוא  מות יומת הרצח
Num 35:18 יח או בכלי עץ יד אשר ימות בו הכהו וימת--רצח הוא  מות יומת הרצח
Num 35:19 יט גאל הדם הוא ימית את הרצח  בפגעו בו הוא ימתנו
Num 35:20 כ ואם בשנאה יהדפנו או השליך עליו בצדיה וימת
Num 35:21 כא או באיבה הכהו בידו וימת--מות יומת המכה רצח הוא  גאל הדם ימית את הרצח--בפגעו בו
Num 35:22 כב ואם בפתע בלא איבה הדפו או השליך עליו כל כלי בלא צדיה
Num 35:23 כג או בכל אבן אשר ימות בה בלא ראות ויפל עליו וימת--והוא לא אויב לו ולא מבקש רעתו
Num 35:24 כד ושפטו העדה בין המכה ובין גאל הדם--על המשפטים האלה
Num 35:25 כה והצילו העדה את הרצח מיד גאל הדם והשיבו אתו העדה אל עיר מקלטו אשר נס שמה וישב בה עד מות הכהן הגדל אשר משח אתו בשמן הקדש
Num 35:26 כו ואם יצא יצא הרצח את גבול עיר מקלטו אשר ינוס שמה
Num 35:27 כז ומצא אתו גאל הדם מחוץ לגבול עיר מקלטו  ורצח גאל הדם את הרצח--אין לו דם
Num 35:28 כח כי בעיר מקלטו ישב עד מות הכהן הגדל ואחרי מות הכהן הגדל--ישוב הרצח אל ארץ אחזתו
Num 35:29 כט והיו אלה לכם לחקת משפט לדרתיכם בכל מושבתיכם
Num 35:30 ל כל מכה נפש--לפי עדים ירצח את הרצח ועד אחד לא יענה בנפש למות
Num 35:31 לא ולא תקחו כפר לנפש רצח אשר הוא רשע למות  כי מות יומת
Num 35:32 לב ולא תקחו כפר לנוס אל עיר מקלטו לשוב לשבת בארץ עד מות הכהן
Num 35:33 לג ולא תחניפו את הארץ אשר אתם בה כי הדם הוא יחניף את הארץ ולארץ לא יכפר לדם אשר שפך בה כי אם בדם שפכו
Num 35:34 לד ולא תטמא את הארץ אשר אתם ישבים בה--אשר אני שכן בתוכה  כי אני יהוה--שכן בתוך בני ישראל  {פ}