Num 34:1 א וידבר יהוה אל משה לאמר
Num 34:2 ב צו את בני ישראל ואמרת אלהם כי אתם באים אל הארץ כנען  זאת הארץ אשר תפל לכם בנחלה ארץ כנען לגבלתיה
Num 34:3 ג והיה לכם פאת נגב ממדבר צן על ידי אדום והיה לכם גבול נגב מקצה ים המלח קדמה
Num 34:4 ד ונסב לכם הגבול מנגב למעלה עקרבים ועבר צנה והיה (והיו) תוצאתיו מנגב לקדש ברנע ויצא חצר אדר ועבר עצמנה
Num 34:5 ה ונסב הגבול מעצמון נחלה מצרים והיו תוצאתיו הימה
Num 34:6 ו וגבול ים והיה לכם הים הגדול וגבול זה יהיה לכם גבול ים
Num 34:7 ז וזה יהיה לכם גבול צפון  מן הים הגדל תתאו לכם הר ההר
Num 34:8 ח מהר ההר תתאו לבא חמת והיו תוצאת הגבל צדדה
Num 34:9 ט ויצא הגבל זפרנה והיו תוצאתיו חצר עינן זה יהיה לכם גבול צפון
Num 34:10 י והתאויתם לכם לגבול קדמה מחצר עינן שפמה
Num 34:11 יא וירד הגבל משפם הרבלה מקדם לעין וירד הגבל ומחה על כתף ים כנרת קדמה
Num 34:12 יב וירד הגבול הירדנה והיו תוצאתיו ים המלח זאת תהיה לכם הארץ לגבלתיה סביב
Num 34:13 יג ויצו משה את בני ישראל לאמר  זאת הארץ אשר תתנחלו אתה בגורל אשר צוה יהוה לתת לתשעת המטות וחצי המטה
Num 34:14 יד כי לקחו מטה בני הראובני לבית אבתם ומטה בני הגדי לבית אבתם וחצי מטה מנשה לקחו נחלתם
Num 34:15 טו שני המטות וחצי המטה  לקחו נחלתם מעבר לירדן ירחו--קדמה מזרחה  {פ}
Num 34:16 טז וידבר יהוה אל משה לאמר
Num 34:17 יז אלה שמות האנשים אשר ינחלו לכם את הארץ  אלעזר הכהן ויהושע בן נון
Num 34:18 יח ונשיא אחד נשיא אחד ממטה--תקחו לנחל את הארץ
Num 34:19 יט ואלה שמות האנשים  למטה יהודה כלב בן יפנה
Num 34:20 כ ולמטה בני שמעון שמואל בן עמיהוד
Num 34:21 כא למטה בנימן אלידד בן כסלון
Num 34:22 כב ולמטה בני דן נשיא--בקי בן יגלי
Num 34:23 כג לבני יוסף למטה בני מנשה נשיא--חניאל בן אפד
Num 34:24 כד ולמטה בני אפרים נשיא--קמואל בן שפטן
Num 34:25 כה ולמטה בני זבולן נשיא--אליצפן בן פרנך
Num 34:26 כו ולמטה בני יששכר נשיא--פלטיאל בן עזן
Num 34:27 כז ולמטה בני אשר נשיא--אחיהוד בן שלמי
Num 34:28 כח ולמטה בני נפתלי נשיא--פדהאל בן עמיהוד
Num 34:29 כט אלה אשר צוה יהוה לנחל את בני ישראל בארץ כנען  {פ}