Num 33:1 א אלה מסעי בני ישראל אשר יצאו מארץ מצרים--לצבאתם  ביד משה ואהרן
Num 33:2 ב ויכתב משה את מוצאיהם למסעיהם--על פי יהוה ואלה מסעיהם למוצאיהם
Num 33:3 ג ויסעו מרעמסס בחדש הראשון בחמשה עשר יום לחדש הראשון  ממחרת הפסח יצאו בני ישראל ביד רמה--לעיני כל מצרים
Num 33:4 ד ומצרים מקברים את אשר הכה יהוה בהם--כל בכור ובאלהיהם עשה יהוה שפטים
Num 33:5 ה ויסעו בני ישראל מרעמסס ויחנו בסכת
Num 33:6 ו ויסעו מסכת ויחנו באתם אשר בקצה המדבר
Num 33:7 ז ויסעו מאתם וישב על פי החירת אשר על פני בעל צפון ויחנו לפני מגדל
Num 33:8 ח ויסעו מפני החירת ויעברו בתוך הים המדברה וילכו דרך שלשת ימים במדבר אתם ויחנו במרה
Num 33:9 ט ויסעו ממרה ויבאו אילמה ובאילם שתים עשרה עינת מים ושבעים תמרים--ויחנו שם
Num 33:10 י ויסעו מאילם ויחנו על ים סוף
Num 33:11 יא ויסעו מים סוף ויחנו במדבר סין
Num 33:12 יב ויסעו ממדבר סין ויחנו בדפקה
Num 33:13 יג ויסעו מדפקה ויחנו באלוש
Num 33:14 יד ויסעו מאלוש ויחנו ברפידם ולא היה שם מים לעם לשתות
Num 33:15 טו ויסעו מרפידם ויחנו במדבר סיני
Num 33:16 טז ויסעו ממדבר סיני ויחנו בקברת התאוה
Num 33:17 יז ויסעו מקברת התאוה ויחנו בחצרת
Num 33:18 יח ויסעו מחצרת ויחנו ברתמה
Num 33:19 יט ויסעו מרתמה ויחנו ברמן פרץ
Num 33:20 כ ויסעו מרמן פרץ ויחנו בלבנה
Num 33:21 כא ויסעו מלבנה ויחנו ברסה
Num 33:22 כב ויסעו מרסה ויחנו בקהלתה
Num 33:23 כג ויסעו מקהלתה ויחנו בהר שפר
Num 33:24 כד ויסעו מהר שפר ויחנו בחרדה
Num 33:25 כה ויסעו מחרדה ויחנו במקהלת
Num 33:26 כו ויסעו ממקהלת ויחנו בתחת
Num 33:27 כז ויסעו מתחת ויחנו בתרח
Num 33:28 כח ויסעו מתרח ויחנו במתקה
Num 33:29 כט ויסעו ממתקה ויחנו בחשמנה
Num 33:30 ל ויסעו מחשמנה ויחנו במסרות
Num 33:31 לא ויסעו ממסרות ויחנו בבני יעקן
Num 33:32 לב ויסעו מבני יעקן ויחנו בחר הגדגד
Num 33:33 לג ויסעו מחר הגדגד ויחנו ביטבתה
Num 33:34 לד ויסעו מיטבתה ויחנו בעברנה
Num 33:35 לה ויסעו מעברנה ויחנו בעצין גבר
Num 33:36 לו ויסעו מעצין גבר ויחנו במדבר צן הוא קדש
Num 33:37 לז ויסעו מקדש ויחנו בהר ההר בקצה ארץ אדום
Num 33:38 לח ויעל אהרן הכהן אל הר ההר על פי יהוה--וימת שם  בשנת הארבעים לצאת בני ישראל מארץ מצרים בחדש החמישי באחד לחדש
Num 33:39 לט ואהרן בן שלש ועשרים ומאת שנה במתו בהר ההר  {ס}
Num 33:40 מ וישמע הכנעני מלך ערד והוא ישב בנגב בארץ כנען--בבא בני ישראל
Num 33:41 מא ויסעו מהר ההר ויחנו בצלמנה
Num 33:42 מב ויסעו מצלמנה ויחנו בפונן
Num 33:43 מג ויסעו מפונן ויחנו באבת
Num 33:44 מד ויסעו מאבת ויחנו בעיי העברים בגבול מואב
Num 33:45 מה ויסעו מעיים ויחנו בדיבן גד
Num 33:46 מו ויסעו מדיבן גד ויחנו בעלמן דבלתימה
Num 33:47 מז ויסעו מעלמן דבלתימה ויחנו בהרי העברים לפני נבו
Num 33:48 מח ויסעו מהרי העברים ויחנו בערבת מואב על ירדן ירחו
Num 33:49 מט ויחנו על הירדן מבית הישמת עד אבל השטים בערבת מואב  {ס}
Num 33:50 נ וידבר יהוה אל משה בערבת מואב על ירדן ירחו לאמר
Num 33:51 נא דבר אל בני ישראל ואמרת אלהם  כי אתם עברים את הירדן אל ארץ כנען
Num 33:52 נב והורשתם את כל ישבי הארץ מפניכם ואבדתם את כל משכיתם ואת כל צלמי מסכתם תאבדו ואת כל במותם תשמידו
Num 33:53 נג והורשתם את הארץ וישבתם בה  כי לכם נתתי את הארץ לרשת אתה
Num 33:54 נד והתנחלתם את הארץ בגורל למשפחתיכם לרב תרבו את נחלתו ולמעט תמעיט את נחלתו--אל אשר יצא לו שמה הגורל לו יהיה  למטות אבתיכם תתנחלו
Num 33:55 נה ואם לא תורישו את ישבי הארץ מפניכם--והיה אשר תותירו מהם לשכים בעיניכם ולצנינם בצדיכם וצררו אתכם--על הארץ אשר אתם ישבים בה
Num 33:56 נו והיה כאשר דמיתי לעשות להם--אעשה לכם  {פ}