Num 31:1 א וידבר יהוה אל משה לאמר
Num 31:2 ב נקם נקמת בני ישראל מאת המדינים אחר תאסף אל עמיך
Num 31:3 ג וידבר משה אל העם לאמר החלצו מאתכם אנשים לצבא ויהיו על מדין לתת נקמת יהוה במדין
Num 31:4 ד אלף למטה אלף למטה--לכל מטות ישראל תשלחו לצבא
Num 31:5 ה וימסרו מאלפי ישראל אלף למטה--שנים עשר אלף חלוצי צבא
Num 31:6 ו וישלח אתם משה אלף למטה לצבא  אתם ואת פינחס בן אלעזר הכהן לצבא וכלי הקדש וחצצרות התרועה בידו
Num 31:7 ז ויצבאו על מדין כאשר צוה יהוה את משה ויהרגו כל זכר
Num 31:8 ח ואת מלכי מדין הרגו על חלליהם את אוי ואת רקם ואת צור ואת חור ואת רבע--חמשת מלכי מדין ואת בלעם בן בעור הרגו בחרב
Num 31:9 ט וישבו בני ישראל את נשי מדין ואת טפם ואת כל בהמתם ואת כל מקנהם ואת כל חילם בזזו
Num 31:10 י ואת כל עריהם במושבתם ואת כל טירתם--שרפו באש
Num 31:11 יא ויקחו את כל השלל ואת כל המלקוח--באדם ובבהמה
Num 31:12 יב ויבאו אל משה ואל אלעזר הכהן ואל עדת בני ישראל את השבי ואת המלקוח ואת השלל--אל המחנה  אל ערבת מואב אשר על ירדן ירחו  {ס}
Num 31:13 יג ויצאו משה ואלעזר הכהן וכל נשיאי העדה--לקראתם  אל מחוץ למחנה
Num 31:14 יד ויקצף משה על פקודי החיל שרי האלפים ושרי המאות הבאים מצבא המלחמה
Num 31:15 טו ויאמר אליהם משה  החייתם כל נקבה
Num 31:16 טז הן הנה היו לבני ישראל בדבר בלעם למסר מעל ביהוה על דבר פעור ותהי המגפה בעדת יהוה
Num 31:17 יז ועתה הרגו כל זכר בטף וכל אשה ידעת איש למשכב זכר--הרגו
Num 31:18 יח וכל הטף בנשים אשר לא ידעו משכב זכר--החיו לכם
Num 31:19 יט ואתם חנו מחוץ למחנה--שבעת ימים  כל הרג נפש וכל נגע בחלל תתחטאו ביום השלישי וביום השביעי--אתם ושביכם
Num 31:20 כ וכל בגד וכל כלי עור וכל מעשה עזים וכל כלי עץ--תתחטאו  {ס}
Num 31:21 כא ויאמר אלעזר הכהן אל אנשי הצבא הבאים למלחמה  זאת חקת התורה אשר צוה יהוה את משה
Num 31:22 כב אך את הזהב ואת הכסף את הנחשת את הברזל את הבדיל ואת העפרת
Num 31:23 כג כל דבר אשר יבא באש תעבירו באש וטהר--אך במי נדה יתחטא וכל אשר לא יבא באש תעבירו במים
Num 31:24 כד וכבסתם בגדיכם ביום השביעי וטהרתם ואחר תבאו אל המחנה  {ס}
Num 31:25 כה ויאמר יהוה אל משה לאמר
Num 31:26 כו שא את ראש מלקוח השבי באדם ובבהמה--אתה ואלעזר הכהן וראשי אבות העדה
Num 31:27 כז וחצית את המלקוח בין תפשי המלחמה היצאים לצבא--ובין כל העדה
Num 31:28 כח והרמת מכס ליהוה מאת אנשי המלחמה היצאים לצבא--אחד נפש מחמש המאות  מן האדם ומן הבקר ומן החמרים ומן הצאן
Num 31:29 כט ממחציתם תקחו ונתתה לאלעזר הכהן תרומת יהוה
Num 31:30 ל וממחצת בני ישראל תקח אחד אחז מן החמשים מן האדם מן הבקר מן החמרים ומן הצאן--מכל הבהמה ונתתה אתם ללוים שמרי משמרת משכן יהוה
Num 31:31 לא ויעש משה ואלעזר הכהן כאשר צוה יהוה את משה
Num 31:32 לב ויהי המלקוח--יתר הבז אשר בזזו עם הצבא  צאן שש מאות אלף ושבעים אלף--וחמשת אלפים
Num 31:33 לג ובקר שנים ושבעים אלף
Num 31:34 לד וחמרים אחד וששים אלף
Num 31:35 לה ונפש אדם--מן הנשים אשר לא ידעו משכב זכר  כל נפש שנים ושלשים אלף
Num 31:36 לו ותהי המחצה--חלק היצאים בצבא  מספר הצאן שלש מאות אלף ושלשים אלף ושבעת אלפים וחמש מאות
Num 31:37 לז ויהי המכס ליהוה מן הצאן--שש מאות חמש ושבעים
Num 31:38 לח והבקר--ששה ושלשים אלף ומכסם ליהוה שנים ושבעים
Num 31:39 לט וחמרים שלשים אלף וחמש מאות ומכסם ליהוה אחד וששים
Num 31:40 מ ונפש אדם ששה עשר אלף ומכסם ליהוה--שנים ושלשים נפש
Num 31:41 מא ויתן משה את מכס תרומת יהוה לאלעזר הכהן--כאשר צוה יהוה את משה
Num 31:42 מב וממחצית בני ישראל אשר חצה משה מן האנשים הצבאים
Num 31:43 מג ותהי מחצת העדה מן הצאן--שלש מאות אלף ושלשים אלף שבעת אלפים וחמש מאות
Num 31:44 מד ובקר ששה ושלשים אלף
Num 31:45 מה וחמרים שלשים אלף וחמש מאות
Num 31:46 מו ונפש אדם ששה עשר אלף
Num 31:47 מז ויקח משה ממחצת בני ישראל את האחז אחד מן החמשים--מן האדם ומן הבהמה ויתן אתם ללוים שמרי משמרת משכן יהוה כאשר צוה יהוה את משה
Num 31:48 מח ויקרבו אל משה הפקדים אשר לאלפי הצבא--שרי האלפים ושרי המאות
Num 31:49 מט ויאמרו אל משה עבדיך נשאו את ראש אנשי המלחמה אשר בידנו ולא נפקד ממנו איש
Num 31:50 נ ונקרב את קרבן יהוה איש אשר מצא כלי זהב אצעדה וצמיד טבעת עגיל וכומז--לכפר על נפשתינו לפני יהוה
Num 31:51 נא ויקח משה ואלעזר הכהן את הזהב--מאתם  כל כלי מעשה
Num 31:52 נב ויהי כל זהב התרומה אשר הרימו ליהוה--ששה עשר אלף שבע מאות וחמשים שקל  מאת שרי האלפים ומאת שרי המאות
Num 31:53 נג אנשי הצבא בזזו איש לו
Num 31:54 נד ויקח משה ואלעזר הכהן את הזהב מאת שרי האלפים והמאות ויבאו אתו אל אהל מועד זכרון לבני ישראל לפני יהוה  {פ}