Num 28:1 א וידבר יהוה אל משה לאמר
Num 28:2 ב צו את בני ישראל ואמרת אלהם  את קרבני לחמי לאשי ריח ניחחי תשמרו להקריב לי במועדו
Num 28:3 ג ואמרת להם--זה האשה אשר תקריבו ליהוה  כבשים בני שנה תמימם שנים ליום עלה תמיד
Num 28:4 ד את הכבש אחד תעשה בבקר ואת הכבש השני תעשה בין הערבים
Num 28:5 ה ועשירית האיפה סלת למנחה בלולה בשמן כתית רביעת ההין
Num 28:6 ו עלת תמיד--העשיה בהר סיני לריח ניחח אשה ליהוה
Num 28:7 ז ונסכו רביעת ההין לכבש האחד בקדש הסך נסך שכר--ליהוה
Num 28:8 ח ואת הכבש השני תעשה בין הערבים  כמנחת הבקר וכנסכו תעשה אשה ריח ניחח ליהוה  {פ}
Num 28:9 ט וביום השבת--שני כבשים בני שנה תמימם ושני עשרנים סלת מנחה בלולה בשמן--ונסכו
Num 28:10 י עלת שבת בשבתו על עלת התמיד ונסכה  {פ}
Num 28:11 יא ובראשי חדשיכם--תקריבו עלה ליהוה  פרים בני בקר שנים ואיל אחד כבשים בני שנה שבעה תמימם
Num 28:12 יב ושלשה עשרנים סלת מנחה בלולה בשמן לפר האחד ושני עשרנים סלת מנחה בלולה בשמן לאיל האחד
Num 28:13 יג ועשרן עשרון סלת מנחה בלולה בשמן לכבש האחד עלה ריח ניחח אשה ליהוה
Num 28:14 יד ונסכיהם חצי ההין יהיה לפר ושלישת ההין לאיל ורביעת ההין לכבש--יין  זאת עלת חדש בחדשו לחדשי השנה
Num 28:15 טו ושעיר עזים אחד לחטאת ליהוה על עלת התמיד יעשה ונסכו  {ס}
Num 28:16 טז ובחדש הראשון בארבעה עשר יום--לחדש  פסח ליהוה
Num 28:17 יז ובחמשה עשר יום לחדש הזה חג  שבעת ימים מצות יאכל
Num 28:18 יח ביום הראשון מקרא קדש  כל מלאכת עבדה לא תעשו
Num 28:19 יט והקרבתם אשה עלה ליהוה פרים בני בקר שנים ואיל אחד ושבעה כבשים בני שנה תמימם יהיו לכם
Num 28:20 כ ומנחתם--סלת בלולה בשמן  שלשה עשרנים לפר ושני עשרנים לאיל--תעשו
Num 28:21 כא עשרון עשרון תעשה לכבש האחד--לשבעת הכבשים
Num 28:22 כב ושעיר חטאת אחד לכפר עליכם
Num 28:23 כג מלבד עלת הבקר אשר לעלת התמיד--תעשו את אלה
Num 28:24 כד כאלה תעשו ליום שבעת ימים--לחם אשה ריח ניחח ליהוה על עולת התמיד יעשה ונסכו
Num 28:25 כה וביום השביעי--מקרא קדש יהיה לכם  כל מלאכת עבדה לא תעשו  {ס}
Num 28:26 כו וביום הבכורים בהקריבכם מנחה חדשה ליהוה--בשבעתיכם  מקרא קדש יהיה לכם כל מלאכת עבדה לא תעשו
Num 28:27 כז והקרבתם עולה לריח ניחח ליהוה--פרים בני בקר שנים איל אחד שבעה כבשים בני שנה
Num 28:28 כח ומנחתם--סלת בלולה בשמן  שלשה עשרנים לפר האחד שני עשרנים לאיל האחד
Num 28:29 כט עשרון עשרון לכבש האחד--לשבעת הכבשים
Num 28:30 ל שעיר עזים אחד לכפר עליכם
Num 28:31 לא מלבד עלת התמיד ומנחתו--תעשו תמימם יהיו לכם ונסכיהם  {פ}