Num 25:1 א וישב ישראל בשטים ויחל העם לזנות אל בנות מואב
Num 25:2 ב ותקראן לעם לזבחי אלהיהן ויאכל העם וישתחוו לאלהיהן
Num 25:3 ג ויצמד ישראל לבעל פעור ויחר אף יהוה בישראל
Num 25:4 ד ויאמר יהוה אל משה קח את כל ראשי העם והוקע אותם ליהוה נגד השמש וישב חרון אף יהוה מישראל
Num 25:5 ה ויאמר משה אל שפטי ישראל  הרגו איש אנשיו הנצמדים לבעל פעור
Num 25:6 ו והנה איש מבני ישראל בא ויקרב אל אחיו את המדינית לעיני משה ולעיני כל עדת בני ישראל והמה בכים פתח אהל מועד
Num 25:7 ז וירא פינחס בן אלעזר בן אהרן הכהן ויקם מתוך העדה ויקח רמח בידו
Num 25:8 ח ויבא אחר איש ישראל אל הקבה וידקר את שניהם--את איש ישראל ואת האשה אל קבתה ותעצר המגפה מעל בני ישראל
Num 25:9 ט ויהיו המתים במגפה--ארבעה ועשרים אלף  {פ}
Num 25:10 י וידבר יהוה אל משה לאמר
Num 25:11 יא פינחס בן אלעזר בן אהרן הכהן השיב את חמתי מעל בני ישראל בקנאו את קנאתי בתוכם ולא כליתי את בני ישראל בקנאתי
Num 25:12 יב לכן אמר  הנני נתן לו את בריתי שלום
Num 25:13 יג והיתה לו ולזרעו אחריו ברית כהנת עולם--תחת אשר קנא לאלהיו ויכפר על בני ישראל
Num 25:14 יד ושם איש ישראל המכה אשר הכה את המדינית--זמרי בן סלוא  נשיא בית אב לשמעני
Num 25:15 טו ושם האשה המכה המדינית כזבי בת צור  ראש אמות בית אב במדין הוא  {פ}
Num 25:16 טז וידבר יהוה אל משה לאמר
Num 25:17 יז צרור את המדינים והכיתם אותם
Num 25:18 יח כי צררים הם לכם בנכליהם אשר נכלו לכם על דבר פעור ועל דבר כזבי בת נשיא מדין אחתם המכה ביום המגפה על דבר פעור