Num 24:1 א וירא בלעם כי טוב בעיני יהוה לברך את ישראל ולא הלך כפעם בפעם לקראת נחשים וישת אל המדבר פניו
Num 24:2 ב וישא בלעם את עיניו וירא את ישראל שכן לשבטיו ותהי עליו רוח אלהים
Num 24:3 ג וישא משלו ויאמר  נאם בלעם בנו בער ונאם הגבר שתם העין
Num 24:4 ד נאם--שמע אמרי אל  אשר מחזה שדי יחזה נפל וגלוי עינים
Num 24:5 ה מה טבו אהליך יעקב משכנתיך ישראל
Num 24:6 ו כנחלים נטיו כגנת עלי נהר כאהלים נטע יהוה כארזים עלי מים
Num 24:7 ז יזל מים מדליו וזרעו במים רבים וירם מאגג מלכו ותנשא מלכתו
Num 24:8 ח אל מוציאו ממצרים כתועפת ראם לו יאכל גוים צריו ועצמתיהם יגרם--וחציו ימחץ
Num 24:9 ט כרע שכב כארי וכלביא מי יקימנו מברכיך ברוך וארריך ארור
Num 24:10 י ויחר אף בלק אל בלעם ויספק את כפיו ויאמר בלק אל בלעם לקב איבי קראתיך והנה ברכת ברך זה שלש פעמים
Num 24:11 יא ועתה ברח לך אל מקומך אמרתי כבד אכבדך והנה מנעך יהוה מכבוד
Num 24:12 יב ויאמר בלעם אל בלק  הלא גם אל מלאכיך אשר שלחת אלי--דברתי לאמר
Num 24:13 יג אם יתן לי בלק מלא ביתו כסף וזהב--לא אוכל לעבר את פי יהוה לעשות טובה או רעה מלבי  אשר ידבר יהוה אתו אדבר
Num 24:14 יד ועתה הנני הולך לעמי לכה איעצך אשר יעשה העם הזה לעמך באחרית הימים
Num 24:15 טו וישא משלו ויאמר  נאם בלעם בנו בער ונאם הגבר שתם העין
Num 24:16 טז נאם שמע אמרי אל וידע דעת עליון מחזה שדי יחזה נפל וגלוי עינים
Num 24:17 יז אראנו ולא עתה אשורנו ולא קרוב דרך כוכב מיעקב וקם שבט מישראל ומחץ פאתי מואב וקרקר כל בני שת
Num 24:18 יח והיה אדום ירשה והיה ירשה שעיר--איביו וישראל עשה חיל
Num 24:19 יט וירד מיעקב והאביד שריד מעיר
Num 24:20 כ וירא את עמלק וישא משלו ויאמר  ראשית גוים עמלק ואחריתו עדי אבד
Num 24:21 כא וירא את הקיני וישא משלו ויאמר  איתן מושבך ושים בסלע קנך
Num 24:22 כב כי אם יהיה לבער קין--עד מה אשור תשבך
Num 24:23 כג וישא משלו ויאמר  אוי מי יחיה משמו אל
Num 24:24 כד וצים מיד כתים וענו אשור וענו עבר וגם הוא עדי אבד
Num 24:25 כה ויקם בלעם וילך וישב למקמו וגם בלק הלך לדרכו  {פ}