Num 23:1 א ויאמר בלעם אל בלק בנה לי בזה שבעה מזבחת והכן לי בזה שבעה פרים ושבעה אילים
Num 23:2 ב ויעש בלק כאשר דבר בלעם ויעל בלק ובלעם פר ואיל במזבח
Num 23:3 ג ויאמר בלעם לבלק התיצב על עלתך ואלכה אולי יקרה יהוה לקראתי ודבר מה יראני והגדתי לך וילך שפי
Num 23:4 ד ויקר אלהים אל בלעם ויאמר אליו את שבעת המזבחת ערכתי ואעל פר ואיל במזבח
Num 23:5 ה וישם יהוה דבר בפי בלעם ויאמר שוב אל בלק וכה תדבר
Num 23:6 ו וישב אליו והנה נצב על עלתו--הוא וכל שרי מואב
Num 23:7 ז וישא משלו ויאמר  מן ארם ינחני בלק מלך מואב מהררי קדם--לכה ארה לי יעקב ולכה זעמה ישראל
Num 23:8 ח מה אקב לא קבה אל ומה אזעם לא זעם יהוה
Num 23:9 ט כי מראש צרים אראנו ומגבעות אשורנו  הן עם לבדד ישכן ובגוים לא יתחשב
Num 23:10 י מי מנה עפר יעקב ומספר את רבע ישראל תמת נפשי מות ישרים ותהי אחריתי כמהו
Num 23:11 יא ויאמר בלק אל בלעם מה עשית לי  לקב איבי לקחתיך והנה ברכת ברך
Num 23:12 יב ויען ויאמר  הלא את אשר ישים יהוה בפי--אתו אשמר לדבר
Num 23:13 יג ויאמר אליו בלק לך נא אתי אל מקום אחר אשר תראנו משם--אפס קצהו תראה וכלו לא תראה וקבנו לי משם
Num 23:14 יד ויקחהו שדה צפים אל ראש הפסגה ויבן שבעה מזבחת ויעל פר ואיל במזבח
Num 23:15 טו ויאמר אל בלק התיצב כה על עלתך ואנכי אקרה כה
Num 23:16 טז ויקר יהוה אל בלעם וישם דבר בפיו ויאמר שוב אל בלק וכה תדבר
Num 23:17 יז ויבא אליו והנו נצב על עלתו ושרי מואב אתו ויאמר לו בלק מה דבר יהוה
Num 23:18 יח וישא משלו ויאמר  קום בלק ושמע האזינה עדי בנו צפר
Num 23:19 יט לא איש אל ויכזב ובן אדם ויתנחם ההוא אמר ולא יעשה ודבר ולא יקימנה
Num 23:20 כ הנה ברך לקחתי וברך ולא אשיבנה
Num 23:21 כא לא הביט און ביעקב ולא ראה עמל בישראל יהוה אלהיו עמו ותרועת מלך בו
Num 23:22 כב אל מוציאם ממצרים--כתועפת ראם לו
Num 23:23 כג כי לא נחש ביעקב ולא קסם בישראל כעת יאמר ליעקב ולישראל מה פעל אל
Num 23:24 כד הן עם כלביא יקום וכארי יתנשא לא ישכב עד יאכל טרף ודם חללים ישתה
Num 23:25 כה ויאמר בלק אל בלעם גם קב לא תקבנו גם ברך לא תברכנו
Num 23:26 כו ויען בלעם ויאמר אל בלק  הלא דברתי אליך לאמר כל אשר ידבר יהוה אתו אעשה
Num 23:27 כז ויאמר בלק אל בלעם לכה נא אקחך אל מקום אחר אולי יישר בעיני האלהים וקבתו לי משם
Num 23:28 כח ויקח בלק את בלעם ראש הפעור הנשקף על פני הישימן
Num 23:29 כט ויאמר בלעם אל בלק בנה לי בזה שבעה מזבחת והכן לי בזה שבעה פרים ושבעה אילם
Num 23:30 ל ויעש בלק כאשר אמר בלעם ויעל פר ואיל במזבח