Num 21:1 א וישמע הכנעני מלך ערד ישב הנגב כי בא ישראל דרך האתרים וילחם בישראל וישב ממנו שבי
Num 21:2 ב וידר ישראל נדר ליהוה ויאמר  אם נתן תתן את העם הזה בידי--והחרמתי את עריהם
Num 21:3 ג וישמע יהוה בקול ישראל ויתן את הכנעני ויחרם אתהם ואת עריהם ויקרא שם המקום חרמה  {פ}
Num 21:4 ד ויסעו מהר ההר דרך ים סוף לסבב את ארץ אדום ותקצר נפש העם בדרך
Num 21:5 ה וידבר העם באלהים ובמשה למה העליתנו ממצרים למות במדבר  כי אין לחם ואין מים ונפשנו קצה בלחם הקלקל
Num 21:6 ו וישלח יהוה בעם את הנחשים השרפים וינשכו את העם וימת עם רב מישראל
Num 21:7 ז ויבא העם אל משה ויאמרו חטאנו כי דברנו ביהוה ובך--התפלל אל יהוה ויסר מעלינו את הנחש ויתפלל משה בעד העם
Num 21:8 ח ויאמר יהוה אל משה עשה לך שרף ושים אתו על נס והיה כל הנשוך וראה אתו וחי
Num 21:9 ט ויעש משה נחש נחשת וישמהו על הנס והיה אם נשך הנחש את איש--והביט אל נחש הנחשת וחי
Num 21:10 י ויסעו בני ישראל ויחנו באבת
Num 21:11 יא ויסעו מאבת ויחנו בעיי העברים במדבר אשר על פני מואב ממזרח השמש
Num 21:12 יב משם נסעו ויחנו בנחל זרד
Num 21:13 יג משם נסעו ויחנו מעבר ארנון אשר במדבר היצא מגבל האמרי  כי ארנון גבול מואב בין מואב ובין האמרי
Num 21:14 יד על כן יאמר בספר מלחמת יהוה  את והב בסופה ואת הנחלים ארנון
Num 21:15 טו ואשד הנחלים אשר נטה לשבת ער ונשען לגבול מואב
Num 21:16 טז ומשם בארה  הוא הבאר אשר אמר יהוה למשה אסף את העם ואתנה להם מים  {ס}
Num 21:17 יז אז ישיר ישראל את השירה הזאת  עלי באר ענו לה
Num 21:18 יח באר חפרוה שרים כרוה נדיבי העם במחקק במשענתם וממדבר מתנה
Num 21:19 יט וממתנה נחליאל ומנחליאל במות
Num 21:20 כ ומבמות הגיא אשר בשדה מואב--ראש הפסגה ונשקפה על פני הישימן  {פ}
Num 21:21 כא וישלח ישראל מלאכים אל סיחן מלך האמרי לאמר
Num 21:22 כב אעברה בארצך לא נטה בשדה ובכרם--לא נשתה מי באר  בדרך המלך נלך עד אשר נעבר גבלך
Num 21:23 כג ולא נתן סיחן את ישראל עבר בגבלו ויאסף סיחן את כל עמו ויצא לקראת ישראל המדברה ויבא יהצה וילחם בישראל
Num 21:24 כד ויכהו ישראל לפי חרב ויירש את ארצו מארנן עד יבק עד בני עמון--כי עז גבול בני עמון
Num 21:25 כה ויקח ישראל את כל הערים האלה וישב ישראל בכל ערי האמרי בחשבון ובכל בנתיה
Num 21:26 כו כי חשבון--עיר סיחן מלך האמרי הוא והוא נלחם במלך מואב הראשון ויקח את כל ארצו מידו עד ארנן
Num 21:27 כז על כן יאמרו המשלים באו חשבון תבנה ותכונן עיר סיחון
Num 21:28 כח כי אש יצאה מחשבון להבה מקרית סיחן  אכלה ער מואב בעלי במות ארנן
Num 21:29 כט אוי לך מואב אבדת עם כמוש נתן בניו פליטם ובנתיו בשבית למלך אמרי סיחון
Num 21:30 ל ונירם אבד חשבון עד דיבן ונשים עד נפח אשר עד מידבא
Num 21:31 לא וישב ישראל בארץ האמרי
Num 21:32 לב וישלח משה לרגל את יעזר וילכדו בנתיה ויירש (ויורש) את האמרי אשר שם
Num 21:33 לג ויפנו ויעלו דרך הבשן ויצא עוג מלך הבשן לקראתם הוא וכל עמו למלחמה--אדרעי
Num 21:34 לד ויאמר יהוה אל משה אל תירא אתו--כי בידך נתתי אתו ואת כל עמו ואת ארצו ועשית לו--כאשר עשית לסיחן מלך האמרי אשר יושב בחשבון
Num 21:35 לה ויכו אתו ואת בניו ואת כל עמו עד בלתי השאיר לו שריד ויירשו את ארצו