Num 20:1 א ויבאו בני ישראל כל העדה מדבר צן בחדש הראשון וישב העם בקדש ותמת שם מרים ותקבר שם
Num 20:2 ב ולא היה מים לעדה ויקהלו על משה ועל אהרן
Num 20:3 ג וירב העם עם משה ויאמרו לאמר ולו גוענו בגוע אחינו לפני יהוה
Num 20:4 ד ולמה הבאתם את קהל יהוה אל המדבר הזה למות שם אנחנו ובעירנו
Num 20:5 ה ולמה העליתנו ממצרים להביא אתנו אל המקום הרע הזה  לא מקום זרע ותאנה וגפן ורמון ומים אין לשתות
Num 20:6 ו ויבא משה ואהרן מפני הקהל אל פתח אהל מועד ויפלו על פניהם וירא כבוד יהוה אליהם  {פ}
Num 20:7 ז וידבר יהוה אל משה לאמר
Num 20:8 ח קח את המטה והקהל את העדה אתה ואהרן אחיך ודברתם אל הסלע לעיניהם ונתן מימיו והוצאת להם מים מן הסלע והשקית את העדה ואת בעירם
Num 20:9 ט ויקח משה את המטה מלפני יהוה כאשר צוהו
Num 20:10 י ויקהלו משה ואהרן את הקהל--אל פני הסלע ויאמר להם שמעו נא המרים--המן הסלע הזה נוציא לכם מים
Num 20:11 יא וירם משה את ידו ויך את הסלע במטהו--פעמים ויצאו מים רבים ותשת העדה ובעירם  {ס}
Num 20:12 יב ויאמר יהוה אל משה ואל אהרן יען לא האמנתם בי להקדישני לעיני בני ישראל--לכן לא תביאו את הקהל הזה אל הארץ אשר נתתי להם
Num 20:13 יג המה מי מריבה אשר רבו בני ישראל את יהוה ויקדש בם  {ס}
Num 20:14 יד וישלח משה מלאכים מקדש אל מלך אדום  כה אמר אחיך ישראל אתה ידעת את כל התלאה אשר מצאתנו
Num 20:15 טו וירדו אבתינו מצרימה ונשב במצרים ימים רבים וירעו לנו מצרים ולאבתינו
Num 20:16 טז ונצעק אל יהוה וישמע קלנו וישלח מלאך ויצאנו ממצרים והנה אנחנו בקדש עיר קצה גבולך
Num 20:17 יז נעברה נא בארצך לא נעבר בשדה ובכרם ולא נשתה מי באר  דרך המלך נלך לא נטה ימין ושמאול עד אשר נעבר גבלך
Num 20:18 יח ויאמר אליו אדום לא תעבר בי--פן בחרב אצא לקראתך
Num 20:19 יט ויאמרו אליו בני ישראל במסלה נעלה ואם מימיך נשתה אני ומקני ונתתי מכרם רק אין דבר ברגלי אעברה
Num 20:20 כ ויאמר לא תעבר ויצא אדום לקראתו בעם כבד וביד חזקה
Num 20:21 כא וימאן אדום נתן את ישראל עבר בגבלו ויט ישראל מעליו  {פ}
Num 20:22 כב ויסעו מקדש ויבאו בני ישראל כל העדה הר ההר
Num 20:23 כג ויאמר יהוה אל משה ואל אהרן בהר ההר על גבול ארץ אדום לאמר
Num 20:24 כד יאסף אהרן אל עמיו כי לא יבא אל הארץ אשר נתתי לבני ישראל--על אשר מריתם את פי למי מריבה
Num 20:25 כה קח את אהרן ואת אלעזר בנו והעל אתם הר ההר
Num 20:26 כו והפשט את אהרן את בגדיו והלבשתם את אלעזר בנו ואהרן יאסף ומת שם
Num 20:27 כז ויעש משה כאשר צוה יהוה ויעלו אל הר ההר לעיני כל העדה
Num 20:28 כח ויפשט משה את אהרן את בגדיו וילבש אתם את אלעזר בנו וימת אהרן שם בראש ההר וירד משה ואלעזר מן ההר
Num 20:29 כט ויראו כל העדה כי גוע אהרן ויבכו את אהרן שלשים יום כל בית ישראל  {ס}