Num 15:1 א וידבר יהוה אל משה לאמר
Num 15:2 ב דבר אל בני ישראל ואמרת אלהם  כי תבאו אל ארץ מושבתיכם אשר אני נתן לכם
Num 15:3 ג ועשיתם אשה ליהוה עלה או זבח לפלא נדר או בנדבה או במעדיכם--לעשות ריח ניחח ליהוה מן הבקר או מן הצאן
Num 15:4 ד והקריב המקריב קרבנו ליהוה--מנחה סלת עשרון בלול ברבעית ההין שמן
Num 15:5 ה ויין לנסך רביעית ההין תעשה על העלה או לזבח--לכבש האחד
Num 15:6 ו או לאיל תעשה מנחה סלת שני עשרנים בלולה בשמן שלשית ההין
Num 15:7 ז ויין לנסך שלשית ההין--תקריב ריח ניחח ליהוה
Num 15:8 ח וכי תעשה בן בקר עלה או זבח לפלא נדר או שלמים ליהוה
Num 15:9 ט והקריב על בן הבקר מנחה סלת שלשה עשרנים בלול בשמן חצי ההין
Num 15:10 י ויין תקריב לנסך חצי ההין--אשה ריח ניחח ליהוה
Num 15:11 יא ככה יעשה לשור האחד או לאיל האחד או לשה בכבשים או בעזים
Num 15:12 יב כמספר אשר תעשו--ככה תעשו לאחד כמספרם
Num 15:13 יג כל האזרח יעשה ככה את אלה להקריב אשה ריח ניחח ליהוה
Num 15:14 יד וכי יגור אתכם גר או אשר בתוככם לדרתיכם ועשה אשה ריח ניחח ליהוה--כאשר תעשו כן יעשה
Num 15:15 טו הקהל חקה אחת לכם ולגר הגר  חקת עולם לדרתיכם ככם כגר יהיה לפני יהוה
Num 15:16 טז תורה אחת ומשפט אחד יהיה לכם ולגר הגר אתכם  {פ}
Num 15:17 יז וידבר יהוה אל משה לאמר
Num 15:18 יח דבר אל בני ישראל ואמרת אלהם  בבאכם אל הארץ אשר אני מביא אתכם שמה
Num 15:19 יט והיה באכלכם מלחם הארץ--תרימו תרומה ליהוה
Num 15:20 כ ראשית ערסתכם--חלה תרימו תרומה  כתרומת גרן כן תרימו אתה
Num 15:21 כא מראשית ערסתיכם תתנו ליהוה תרומה--לדרתיכם  {ס}
Num 15:22 כב וכי תשגו--ולא תעשו את כל המצות האלה  אשר דבר יהוה אל משה
Num 15:23 כג את כל אשר צוה יהוה אליכם ביד משה  מן היום אשר צוה יהוה והלאה--לדרתיכם
Num 15:24 כד והיה אם מעיני העדה נעשתה לשגגה ועשו כל העדה פר בן בקר אחד לעלה לריח ניחח ליהוה ומנחתו ונסכו כמשפט ושעיר עזים אחד לחטת
Num 15:25 כה וכפר הכהן על כל עדת בני ישראל--ונסלח להם  כי שגגה הוא--והם הביאו את קרבנם אשה ליהוה וחטאתם לפני יהוה על שגגתם
Num 15:26 כו ונסלח לכל עדת בני ישראל ולגר הגר בתוכם  כי לכל העם בשגגה  {ס}
Num 15:27 כז ואם נפש אחת תחטא בשגגה--והקריבה עז בת שנתה לחטאת
Num 15:28 כח וכפר הכהן על הנפש השגגת בחטאה בשגגה--לפני יהוה  לכפר עליו ונסלח לו
Num 15:29 כט האזרח בבני ישראל ולגר הגר בתוכם--תורה אחת יהיה לכם לעשה בשגגה
Num 15:30 ל והנפש אשר תעשה ביד רמה מן האזרח ומן הגר--את יהוה הוא מגדף ונכרתה הנפש ההוא מקרב עמה
Num 15:31 לא כי דבר יהוה בזה ואת מצותו הפר הכרת תכרת הנפש ההוא עונה בה  {פ}
Num 15:32 לב ויהיו בני ישראל במדבר וימצאו איש מקשש עצים--ביום השבת
Num 15:33 לג ויקריבו אתו המצאים אתו מקשש עצים--אל משה ואל אהרן ואל כל העדה
Num 15:34 לד ויניחו אתו במשמר  כי לא פרש מה יעשה לו  {ס}
Num 15:35 לה ויאמר יהוה אל משה מות יומת האיש רגום אתו באבנים כל העדה מחוץ למחנה
Num 15:36 לו ויציאו אתו כל העדה אל מחוץ למחנה וירגמו אתו באבנים וימת  כאשר צוה יהוה את משה  {פ}
Num 15:37 לז ויאמר יהוה אל משה לאמר
Num 15:38 לח דבר אל בני ישראל ואמרת אלהם ועשו להם ציצת על כנפי בגדיהם לדרתם ונתנו על ציצת הכנף פתיל תכלת
Num 15:39 לט והיה לכם לציצת וראיתם אתו וזכרתם את כל מצות יהוה ועשיתם אתם ולא תתורו אחרי לבבכם ואחרי עיניכם אשר אתם זנים אחריהם
Num 15:40 מ למען תזכרו ועשיתם את כל מצותי והייתם קדשים לאלהיכם
Num 15:41 מא אני יהוה אלהיכם אשר הוצאתי אתכם מארץ מצרים להיות לכם לאלהים  אני יהוה אלהיכם  {פ}