Num 13:1 א וידבר יהוה אל משה לאמר
Num 13:2 ב שלח לך אנשים ויתרו את ארץ כנען אשר אני נתן לבני ישראל  איש אחד איש אחד למטה אבתיו תשלחו--כל נשיא בהם
Num 13:3 ג וישלח אתם משה ממדבר פארן על פי יהוה  כלם אנשים ראשי בני ישראל המה
Num 13:4 ד ואלה שמותם  למטה ראובן שמוע בן זכור
Num 13:5 ה למטה שמעון שפט בן חורי
Num 13:6 ו למטה יהודה כלב בן יפנה
Num 13:7 ז למטה יששכר יגאל בן יוסף
Num 13:8 ח למטה אפרים הושע בן נון
Num 13:9 ט למטה בנימן פלטי בן רפוא
Num 13:10 י למטה זבולן גדיאל בן סודי
Num 13:11 יא למטה יוסף למטה מנשה--גדי בן סוסי
Num 13:12 יב למטה דן עמיאל בן גמלי
Num 13:13 יג למטה אשר סתור בן מיכאל
Num 13:14 יד למטה נפתלי נחבי בן ופסי
Num 13:15 טו למטה גד גאואל בן מכי
Num 13:16 טז אלה שמות האנשים אשר שלח משה לתור את הארץ ויקרא משה להושע בן נון יהושע
Num 13:17 יז וישלח אתם משה לתור את ארץ כנען ויאמר אלהם עלו זה בנגב ועליתם את ההר
Num 13:18 יח וראיתם את הארץ מה הוא ואת העם הישב עליה--החזק הוא הרפה המעט הוא אם רב
Num 13:19 יט ומה הארץ אשר הוא ישב בה--הטובה הוא אם רעה ומה הערים אשר הוא יושב בהנה--הבמחנים אם במבצרים
Num 13:20 כ ומה הארץ השמנה הוא אם רזה היש בה עץ אם אין והתחזקתם ולקחתם מפרי הארץ והימים--ימי בכורי ענבים
Num 13:21 כא ויעלו ויתרו את הארץ ממדבר צן עד רחב לבא חמת
Num 13:22 כב ויעלו בנגב ויבא עד חברון ושם אחימן ששי ותלמי ילידי הענק וחברון שבע שנים נבנתה לפני צען מצרים
Num 13:23 כג ויבאו עד נחל אשכל ויכרתו משם זמורה ואשכול ענבים אחד וישאהו במוט בשנים ומן הרמנים ומן התאנים
Num 13:24 כד למקום ההוא קרא נחל אשכול על אדות האשכול אשר כרתו משם בני ישראל
Num 13:25 כה וישבו מתור הארץ מקץ ארבעים יום
Num 13:26 כו וילכו ויבאו אל משה ואל אהרן ואל כל עדת בני ישראל אל מדבר פארן--קדשה וישיבו אתם דבר ואת כל העדה ויראום את פרי הארץ
Num 13:27 כז ויספרו לו ויאמרו באנו אל הארץ אשר שלחתנו וגם זבת חלב ודבש הוא--וזה פריה
Num 13:28 כח אפס כי עז העם הישב בארץ והערים בצרות גדלת מאד וגם ילדי הענק ראינו שם
Num 13:29 כט עמלק יושב בארץ הנגב והחתי והיבוסי והאמרי יושב בהר והכנעני יושב על הים ועל יד הירדן
Num 13:30 ל ויהס כלב את העם אל משה ויאמר עלה נעלה וירשנו אתה--כי יכול נוכל לה
Num 13:31 לא והאנשים אשר עלו עמו אמרו לא נוכל לעלות אל העם  כי חזק הוא ממנו
Num 13:32 לב ויציאו דבת הארץ אשר תרו אתה אל בני ישראל לאמר  הארץ אשר עברנו בה לתור אתה ארץ אכלת יושביה הוא וכל העם אשר ראינו בתוכה אנשי מדות
Num 13:33 לג ושם ראינו את הנפילים בני ענק--מן הנפלים ונהי בעינינו כחגבים וכן היינו בעיניהם