Num 10:1 א וידבר יהוה אל משה לאמר
Num 10:2 ב עשה לך שתי חצוצרת כסף--מקשה תעשה אתם והיו לך למקרא העדה ולמסע את המחנות
Num 10:3 ג ותקעו בהן--ונועדו אליך כל העדה אל פתח אהל מועד
Num 10:4 ד ואם באחת יתקעו--ונועדו אליך הנשיאים ראשי אלפי ישראל
Num 10:5 ה ותקעתם תרועה--ונסעו המחנות החנים קדמה
Num 10:6 ו ותקעתם תרועה שנית--ונסעו המחנות החנים תימנה תרועה יתקעו למסעיהם
Num 10:7 ז ובהקהיל את הקהל--תתקעו ולא תריעו
Num 10:8 ח ובני אהרן הכהנים יתקעו בחצצרות והיו לכם לחקת עולם לדרתיכם
Num 10:9 ט וכי תבאו מלחמה בארצכם על הצר הצרר אתכם--והרעתם בחצצרת ונזכרתם לפני יהוה אלהיכם ונושעתם מאיביכם
Num 10:10 י וביום שמחתכם ובמועדיכם ובראשי חדשיכם--ותקעתם בחצצרת על עלתיכם ועל זבחי שלמיכם והיו לכם לזכרון לפני אלהיכם אני יהוה אלהיכם  {פ}
Num 10:11 יא ויהי בשנה השנית בחדש השני--בעשרים בחדש נעלה הענן מעל משכן העדת
Num 10:12 יב ויסעו בני ישראל למסעיהם ממדבר סיני וישכן הענן במדבר פארן
Num 10:13 יג ויסעו בראשנה על פי יהוה ביד משה
Num 10:14 יד ויסע דגל מחנה בני יהודה בראשנה--לצבאתם ועל צבאו--נחשון בן עמינדב
Num 10:15 טו ועל צבא--מטה בני יששכר  נתנאל בן צוער
Num 10:16 טז ועל צבא--מטה בני זבולן  אליאב בן חלן
Num 10:17 יז והורד המשכן ונסעו בני גרשון ובני מררי נשאי המשכן
Num 10:18 יח ונסע דגל מחנה ראובן--לצבאתם ועל צבאו--אליצור בן שדיאור
Num 10:19 יט ועל צבא--מטה בני שמעון  שלמיאל בן צורישדי
Num 10:20 כ ועל צבא מטה בני גד  אליסף בן דעואל
Num 10:21 כא ונסעו הקהתים נשאי המקדש והקימו את המשכן עד באם
Num 10:22 כב ונסע דגל מחנה בני אפרים--לצבאתם ועל צבאו--אלישמע בן עמיהוד
Num 10:23 כג ועל צבא--מטה בני מנשה  גמליאל בן פדהצור
Num 10:24 כד ועל צבא--מטה בני בנימן  אבידן בן גדעוני
Num 10:25 כה ונסע דגל מחנה בני דן--מאסף לכל המחנת לצבאתם ועל צבאו--אחיעזר בן עמישדי
Num 10:26 כו ועל צבא--מטה בני אשר  פגעיאל בן עכרן
Num 10:27 כז ועל צבא--מטה בני נפתלי  אחירע בן עינן
Num 10:28 כח אלה מסעי בני ישראל לצבאתם ויסעו  {ס}
Num 10:29 כט ויאמר משה לחבב בן רעואל המדיני חתן משה נסעים אנחנו אל המקום אשר אמר יהוה אתו אתן לכם לכה אתנו והטבנו לך כי יהוה דבר טוב על ישראל
Num 10:30 ל ויאמר אליו לא אלך  כי אם אל ארצי ואל מולדתי אלך
Num 10:31 לא ויאמר אל נא תעזב אתנו  כי על כן ידעת חנתנו במדבר והיית לנו לעינים
Num 10:32 לב והיה כי תלך עמנו  והיה הטוב ההוא אשר ייטיב יהוה עמנו--והטבנו לך
Num 10:33 לג ויסעו מהר יהוה דרך שלשת ימים וארון ברית יהוה נסע לפניהם דרך שלשת ימים לתור להם מנוחה
Num 10:34 לד וענן יהוה עליהם יומם בנסעם מן המחנה  {ס}  ]  {ס}
Num 10:35 לה ויהי בנסע הארן ויאמר משה  קומה יהוה ויפצו איביך וינסו משנאיך מפניך
Num 10:36 לו ובנחה יאמר  שובה יהוה רבבות אלפי ישראל  {ס}  ]  {פ}