Num 3:1 א ואלה תולדת אהרן ומשה  ביום דבר יהוה את משה--בהר סיני
Num 3:2 ב ואלה שמות בני אהרן הבכר נדב ואביהוא אלעזר ואיתמר
Num 3:3 ג אלה שמות בני אהרן הכהנים המשחים--אשר מלא ידם לכהן
Num 3:4 ד וימת נדב ואביהוא לפני יהוה בהקרבם אש זרה לפני יהוה במדבר סיני ובנים לא היו להם ויכהן אלעזר ואיתמר על פני אהרן אביהם  {פ}
Num 3:5 ה וידבר יהוה אל משה לאמר
Num 3:6 ו הקרב את מטה לוי והעמדת אתו לפני אהרן הכהן ושרתו אתו
Num 3:7 ז ושמרו את משמרתו ואת משמרת כל העדה לפני אהל מועד--לעבד את עבדת המשכן
Num 3:8 ח ושמרו את כל כלי אהל מועד ואת משמרת בני ישראל--לעבד את עבדת המשכן
Num 3:9 ט ונתתה את הלוים לאהרן ולבניו  נתונם נתונם המה לו מאת בני ישראל
Num 3:10 י ואת אהרן ואת בניו תפקד ושמרו את כהנתם והזר הקרב יומת  {פ}
Num 3:11 יא וידבר יהוה אל משה לאמר
Num 3:12 יב ואני הנה לקחתי את הלוים מתוך בני ישראל תחת כל בכור פטר רחם מבני ישראל והיו לי הלוים
Num 3:13 יג כי לי כל בכור--ביום הכתי כל בכור בארץ מצרים הקדשתי לי כל בכור בישראל מאדם עד בהמה  לי יהיו אני יהוה  {פ}
Num 3:14 יד וידבר יהוה אל משה במדבר סיני לאמר
Num 3:15 טו פקד את בני לוי לבית אבתם למשפחתם  כל זכר מבן חדש ומעלה תפקדם
Num 3:16 טז ויפקד אתם משה על פי יהוה כאשר צוה
Num 3:17 יז ויהיו אלה בני לוי בשמתם--גרשון וקהת ומררי
Num 3:18 יח ואלה שמות בני גרשון למשפחתם--לבני ושמעי
Num 3:19 יט ובני קהת למשפחתם--עמרם ויצהר חברון ועזיאל
Num 3:20 כ ובני מררי למשפחתם--מחלי ומושי אלה הם משפחת הלוי לבית אבתם
Num 3:21 כא לגרשון--משפחת הלבני ומשפחת השמעי אלה הם משפחת הגרשני
Num 3:22 כב פקדיהם במספר כל זכר מבן חדש ומעלה פקדיהם שבעת אלפים וחמש מאות
Num 3:23 כג משפחת הגרשני אחרי המשכן יחנו ימה
Num 3:24 כד ונשיא בית אב לגרשני אליסף בן לאל
Num 3:25 כה ומשמרת בני גרשון באהל מועד המשכן והאהל מכסהו--ומסך פתח אהל מועד
Num 3:26 כו וקלעי החצר ואת מסך פתח החצר אשר על המשכן ועל המזבח סביב ואת מיתריו לכל עבדתו  {ס}
Num 3:27 כז ולקהת משפחת העמרמי ומשפחת היצהרי ומשפחת החברני ומשפחת העזיאלי אלה הם משפחת הקהתי
Num 3:28 כח במספר כל זכר מבן חדש ומעלה--שמנת אלפים ושש מאות שמרי משמרת הקדש
Num 3:29 כט משפחת בני קהת יחנו על ירך המשכן תימנה
Num 3:30 ל ונשיא בית אב למשפחת הקהתי אליצפן בן עזיאל
Num 3:31 לא ומשמרתם הארן והשלחן והמנרה והמזבחת וכלי הקדש אשר ישרתו בהם והמסך--וכל עבדתו
Num 3:32 לב ונשיא נשיאי הלוי אלעזר בן אהרן הכהן פקדת שמרי משמרת הקדש
Num 3:33 לג למררי--משפחת המחלי ומשפחת המושי אלה הם משפחת מררי
Num 3:34 לד ופקדיהם במספר כל זכר מבן חדש ומעלה--ששת אלפים ומאתים
Num 3:35 לה ונשיא בית אב למשפחת מררי צוריאל בן אביחיל על ירך המשכן יחנו צפנה
Num 3:36 לו ופקדת משמרת בני מררי--קרשי המשכן ובריחיו ועמדיו ואדניו וכל כליו--וכל עבדתו
Num 3:37 לז ועמדי החצר סביב ואדניהם ויתדתם ומיתריהם
Num 3:38 לח והחנים לפני המשכן קדמה לפני אהל מועד מזרחה משה ואהרן ובניו שמרים משמרת המקדש למשמרת בני ישראל והזר הקרב יומת
Num 3:39 לט כל פקודי הלוים אשר פקד משה ואהרן על פי יהוה--למשפחתם  כל זכר מבן חדש ומעלה שנים ועשרים אלף  {ס}
Num 3:40 מ ויאמר יהוה אל משה פקד כל בכר זכר לבני ישראל מבן חדש ומעלה ושא את מספר שמתם
Num 3:41 מא ולקחת את הלוים לי אני יהוה תחת כל בכר בבני ישראל ואת בהמת הלוים תחת כל בכור בבהמת בני ישראל
Num 3:42 מב ויפקד משה כאשר צוה יהוה אתו את כל בכור בבני ישראל
Num 3:43 מג ויהי כל בכור זכר במספר שמת מבן חדש ומעלה--לפקדיהם  שנים ועשרים אלף שלשה ושבעים ומאתים  {פ}
Num 3:44 מד וידבר יהוה אל משה לאמר
Num 3:45 מה קח את הלוים תחת כל בכור בבני ישראל ואת בהמת הלוים תחת בהמתם והיו לי הלוים אני יהוה
Num 3:46 מו ואת פדויי השלשה והשבעים והמאתים--העדפים על הלוים מבכור בני ישראל
Num 3:47 מז ולקחת חמשת חמשת שקלים--לגלגלת  בשקל הקדש תקח עשרים גרה השקל
Num 3:48 מח ונתתה הכסף לאהרן ולבניו--פדויי העדפים בהם
Num 3:49 מט ויקח משה את כסף הפדיום--מאת העדפים על פדויי הלוים
Num 3:50 נ מאת בכור בני ישראל--לקח את הכסף  חמשה וששים ושלש מאות ואלף--בשקל הקדש
Num 3:51 נא ויתן משה את כסף הפדים לאהרן ולבניו--על פי יהוה  כאשר צוה יהוה את משה  {פ}