Num 2:1 א וידבר יהוה אל משה ואל אהרן לאמר
Num 2:2 ב איש על דגלו באתת לבית אבתם יחנו בני ישראל  מנגד סביב לאהל מועד יחנו
Num 2:3 ג והחנים קדמה מזרחה דגל מחנה יהודה לצבאתם ונשיא לבני יהודה נחשון בן עמינדב
Num 2:4 ד וצבאו ופקדיהם--ארבעה ושבעים אלף ושש מאות
Num 2:5 ה והחנים עליו מטה יששכר ונשיא לבני יששכר נתנאל בן צוער
Num 2:6 ו וצבאו ופקדיו--ארבעה וחמשים אלף וארבע מאות
Num 2:7 ז מטה זבולן ונשיא לבני זבולן אליאב בן חלן
Num 2:8 ח וצבאו ופקדיו--שבעה וחמשים אלף וארבע מאות
Num 2:9 ט כל הפקדים למחנה יהודה מאת אלף ושמנים אלף וששת אלפים וארבע מאות--לצבאתם ראשנה יסעו  {ס}
Num 2:10 י דגל מחנה ראובן תימנה לצבאתם ונשיא לבני ראובן אליצור בן שדיאור
Num 2:11 יא וצבאו ופקדיו--ששה וארבעים אלף וחמש מאות
Num 2:12 יב והחונם עליו מטה שמעון ונשיא לבני שמעון שלמיאל בן צורישדי
Num 2:13 יג וצבאו ופקדיהם--תשעה וחמשים אלף ושלש מאות
Num 2:14 יד ומטה גד ונשיא לבני גד אליסף בן רעואל
Num 2:15 טו וצבאו ופקדיהם--חמשה וארבעים אלף ושש מאות וחמשים
Num 2:16 טז כל הפקדים למחנה ראובן מאת אלף ואחד וחמשים אלף וארבע מאות וחמשים--לצבאתם ושנים יסעו  {ס}
Num 2:17 יז ונסע אהל מועד מחנה הלוים בתוך המחנת כאשר יחנו כן יסעו איש על ידו לדגליהם  {ס}
Num 2:18 יח דגל מחנה אפרים לצבאתם ימה ונשיא לבני אפרים אלישמע בן עמיהוד
Num 2:19 יט וצבאו ופקדיהם--ארבעים אלף וחמש מאות
Num 2:20 כ ועליו מטה מנשה ונשיא לבני מנשה גמליאל בן פדהצור
Num 2:21 כא וצבאו ופקדיהם--שנים ושלשים אלף ומאתים
Num 2:22 כב ומטה בנימן ונשיא לבני בנימן אבידן בן גדעני
Num 2:23 כג וצבאו ופקדיהם--חמשה ושלשים אלף וארבע מאות
Num 2:24 כד כל הפקדים למחנה אפרים מאת אלף ושמנת אלפים ומאה--לצבאתם ושלשים יסעו  {ס}
Num 2:25 כה דגל מחנה דן צפנה לצבאתם ונשיא לבני דן אחיעזר בן עמישדי
Num 2:26 כו וצבאו ופקדיהם--שנים וששים אלף ושבע מאות
Num 2:27 כז והחנים עליו מטה אשר ונשיא לבני אשר פגעיאל בן עכרן
Num 2:28 כח וצבאו ופקדיהם--אחד וארבעים אלף וחמש מאות
Num 2:29 כט ומטה נפתלי ונשיא לבני נפתלי אחירע בן עינן
Num 2:30 ל וצבאו ופקדיהם--שלשה וחמשים אלף וארבע מאות
Num 2:31 לא כל הפקדים למחנה דן--מאת אלף ושבעה וחמשים אלף ושש מאות לאחרנה יסעו לדגליהם  {פ}
Num 2:32 לב אלה פקודי בני ישראל לבית אבתם  כל פקודי המחנת לצבאתם--שש מאות אלף ושלשת אלפים וחמש מאות וחמשים
Num 2:33 לג והלוים--לא התפקדו בתוך בני ישראל  כאשר צוה יהוה את משה
Num 2:34 לד ויעשו בני ישראל  ככל אשר צוה יהוה את משה כן חנו לדגליהם וכן נסעו--איש למשפחתיו על בית אבתיו  {פ}