Lev 25:1 א וידבר יהוה אל משה בהר סיני לאמר
Lev 25:2 ב דבר אל בני ישראל ואמרת אלהם כי תבאו אל הארץ אשר אני נתן לכם--ושבתה הארץ שבת ליהוה
Lev 25:3 ג שש שנים תזרע שדך ושש שנים תזמר כרמך ואספת את תבואתה
Lev 25:4 ד ובשנה השביעת שבת שבתון יהיה לארץ--שבת ליהוה  שדך לא תזרע וכרמך לא תזמר
Lev 25:5 ה את ספיח קצירך לא תקצור ואת ענבי נזירך לא תבצר  שנת שבתון יהיה לארץ
Lev 25:6 ו והיתה שבת הארץ לכם לאכלה--לך ולעבדך ולאמתך ולשכירך ולתושבך הגרים עמך
Lev 25:7 ז ולבהמתך--ולחיה אשר בארצך  תהיה כל תבואתה לאכל  {ס}
Lev 25:8 ח וספרת לך שבע שבתת שנים--שבע שנים שבע פעמים והיו לך ימי שבע שבתת השנים תשע וארבעים שנה
Lev 25:9 ט והעברת שופר תרועה בחדש השבעי בעשור לחדש ביום הכפרים תעבירו שופר בכל ארצכם
Lev 25:10 י וקדשתם את שנת החמשים שנה וקראתם דרור בארץ לכל ישביה יובל הוא תהיה לכם ושבתם איש אל אחזתו ואיש אל משפחתו תשבו
Lev 25:11 יא יובל הוא שנת החמשים שנה--תהיה לכם לא תזרעו--ולא תקצרו את ספיחיה ולא תבצרו את נזריה
Lev 25:12 יב כי יובל הוא קדש תהיה לכם מן השדה--תאכלו את תבואתה
Lev 25:13 יג בשנת היובל הזאת תשבו איש אל אחזתו
Lev 25:14 יד וכי תמכרו ממכר לעמיתך או קנה מיד עמיתך--אל תונו איש את אחיו
Lev 25:15 טו במספר שנים אחר היובל תקנה מאת עמיתך במספר שני תבואת ימכר לך
Lev 25:16 טז לפי רב השנים תרבה מקנתו ולפי מעט השנים תמעיט מקנתו  כי מספר תבואת הוא מכר לך
Lev 25:17 יז ולא תונו איש את עמיתו ויראת מאלהיך  כי אני יהוה אלהיכם
Lev 25:18 יח ועשיתם את חקתי ואת משפטי תשמרו ועשיתם אתם--וישבתם על הארץ לבטח
Lev 25:19 יט ונתנה הארץ פריה ואכלתם לשבע וישבתם לבטח עליה
Lev 25:20 כ וכי תאמרו מה נאכל בשנה השביעת  הן לא נזרע ולא נאסף את תבואתנו
Lev 25:21 כא וצויתי את ברכתי לכם בשנה הששית ועשת את התבואה לשלש השנים
Lev 25:22 כב וזרעתם את השנה השמינת ואכלתם מן התבואה ישן עד השנה התשיעת עד בוא תבואתה--תאכלו ישן
Lev 25:23 כג והארץ לא תמכר לצמתת--כי לי הארץ  כי גרים ותושבים אתם עמדי
Lev 25:24 כד ובכל ארץ אחזתכם גאלה תתנו לארץ  {ס}
Lev 25:25 כה כי ימוך אחיך ומכר מאחזתו--ובא גאלו הקרב אליו וגאל את ממכר אחיו
Lev 25:26 כו ואיש כי לא יהיה לו גאל והשיגה ידו ומצא כדי גאלתו
Lev 25:27 כז וחשב את שני ממכרו והשיב את העדף לאיש אשר מכר לו ושב לאחזתו
Lev 25:28 כח ואם לא מצאה ידו די השיב לו--והיה ממכרו ביד הקנה אתו עד שנת היובל ויצא ביבל ושב לאחזתו  {ס}
Lev 25:29 כט ואיש כי ימכר בית מושב עיר חומה--והיתה גאלתו עד תם שנת ממכרו  ימים תהיה גאלתו
Lev 25:30 ל ואם לא יגאל עד מלאת לו שנה תמימה--וקם הבית אשר בעיר אשר לא (לו) חמה לצמיתת לקנה אתו לדרתיו  לא יצא ביבל
Lev 25:31 לא ובתי החצרים אשר אין להם חמה סביב--על שדה הארץ יחשב  גאלה תהיה לו וביבל יצא
Lev 25:32 לב וערי הלוים--בתי ערי אחזתם  גאלת עולם תהיה ללוים
Lev 25:33 לג ואשר יגאל מן הלוים ויצא ממכר בית ועיר אחזתו ביבל  כי בתי ערי הלוים הוא אחזתם בתוך בני ישראל
Lev 25:34 לד ושדה מגרש עריהם לא ימכר  כי אחזת עולם הוא להם  {ס}
Lev 25:35 לה וכי ימוך אחיך ומטה ידו עמך--והחזקת בו גר ותושב וחי עמך
Lev 25:36 לו אל תקח מאתו נשך ותרבית ויראת מאלהיך וחי אחיך עמך
Lev 25:37 לז את כספך--לא תתן לו בנשך ובמרבית לא תתן אכלך
Lev 25:38 לח אני יהוה אלהיכם אשר הוצאתי אתכם מארץ מצרים--לתת לכם את ארץ כנען להיות לכם לאלהים  {ס}
Lev 25:39 לט וכי ימוך אחיך עמך ונמכר לך--לא תעבד בו עבדת עבד
Lev 25:40 מ כשכיר כתושב יהיה עמך עד שנת היבל יעבד עמך
Lev 25:41 מא ויצא מעמך--הוא ובניו עמו ושב אל משפחתו ואל אחזת אבתיו ישוב
Lev 25:42 מב כי עבדי הם אשר הוצאתי אתם מארץ מצרים לא ימכרו ממכרת עבד
Lev 25:43 מג לא תרדה בו בפרך ויראת מאלהיך
Lev 25:44 מד ועבדך ואמתך אשר יהיו לך  מאת הגוים אשר סביבתיכם--מהם תקנו עבד ואמה
Lev 25:45 מה וגם מבני התושבים הגרים עמכם מהם תקנו וממשפחתם אשר עמכם אשר הולידו בארצכם והיו לכם לאחזה
Lev 25:46 מו והתנחלתם אתם לבניכם אחריכם לרשת אחזה--לעלם בהם תעבדו ובאחיכם בני ישראל איש באחיו לא תרדה בו בפרך  {ס}
Lev 25:47 מז וכי תשיג יד גר ותושב עמך ומך אחיך עמו ונמכר לגר תושב עמך או לעקר משפחת גר
Lev 25:48 מח אחרי נמכר גאלה תהיה לו  אחד מאחיו יגאלנו
Lev 25:49 מט או דדו או בן דדו יגאלנו או משאר בשרו ממשפחתו יגאלנו או השיגה ידו ונגאל
Lev 25:50 נ וחשב עם קנהו משנת המכרו לו עד שנת היבל והיה כסף ממכרו במספר שנים כימי שכיר יהיה עמו
Lev 25:51 נא אם עוד רבות בשנים--לפיהן ישיב גאלתו מכסף מקנתו
Lev 25:52 נב ואם מעט נשאר בשנים עד שנת היבל--וחשב לו כפי שניו ישיב את גאלתו
Lev 25:53 נג כשכיר שנה בשנה יהיה עמו לא ירדנו בפרך לעיניך
Lev 25:54 נד ואם לא יגאל באלה--ויצא בשנת היבל הוא ובניו עמו
Lev 25:55 נה כי לי בני ישראל עבדים--עבדי הם אשר הוצאתי אותם מארץ מצרים  אני יהוה אלהיכם