Lev 18:1 א וידבר יהוה אל משה לאמר
Lev 18:2 ב דבר אל בני ישראל ואמרת אלהם  אני יהוה אלהיכם
Lev 18:3 ג כמעשה ארץ מצרים אשר ישבתם בה לא תעשו וכמעשה ארץ כנען אשר אני מביא אתכם שמה לא תעשו ובחקתיהם לא תלכו
Lev 18:4 ד את משפטי תעשו ואת חקתי תשמרו ללכת בהם  אני יהוה אלהיכם
Lev 18:5 ה ושמרתם את חקתי ואת משפטי אשר יעשה אתם האדם וחי בהם  אני יהוה  {ס}
Lev 18:6 ו איש איש אל כל שאר בשרו לא תקרבו לגלות ערוה  אני יהוה  {ס}
Lev 18:7 ז ערות אביך וערות אמך לא תגלה  אמך הוא לא תגלה ערותה  {ס}
Lev 18:8 ח ערות אשת אביך לא תגלה  ערות אביך הוא  {ס}
Lev 18:9 ט ערות אחותך בת אביך או בת אמך מולדת בית או מולדת חוץ--לא תגלה ערותן  {ס}
Lev 18:10 י ערות בת בנך או בת בתך לא תגלה ערותן  כי ערותך הנה  {ס}
Lev 18:11 יא ערות בת אשת אביך מולדת אביך אחותך הוא--לא תגלה ערותה  {ס}
Lev 18:12 יב ערות אחות אביך לא תגלה  שאר אביך הוא  {ס}
Lev 18:13 יג ערות אחות אמך לא תגלה  כי שאר אמך הוא  {ס}
Lev 18:14 יד ערות אחי אביך לא תגלה  אל אשתו לא תקרב דדתך הוא  {ס}
Lev 18:15 טו ערות כלתך לא תגלה  אשת בנך הוא לא תגלה ערותה  {ס}
Lev 18:16 טז ערות אשת אחיך לא תגלה  ערות אחיך הוא  {ס}
Lev 18:17 יז ערות אשה ובתה לא תגלה  את בת בנה ואת בת בתה לא תקח לגלות ערותה--שארה הנה זמה הוא
Lev 18:18 יח ואשה אל אחתה לא תקח  לצרר לגלות ערותה עליה--בחייה
Lev 18:19 יט ואל אשה בנדת טמאתה--לא תקרב לגלות ערותה
Lev 18:20 כ ואל אשת עמיתך--לא תתן שכבתך לזרע  לטמאה בה
Lev 18:21 כא ומזרעך לא תתן להעביר למלך ולא תחלל את שם אלהיך אני יהוה
Lev 18:22 כב ואת זכר--לא תשכב משכבי אשה  תועבה הוא
Lev 18:23 כג ובכל בהמה לא תתן שכבתך לטמאה בה ואשה לא תעמד לפני בהמה לרבעה--תבל הוא
Lev 18:24 כד אל תטמאו בכל אלה  כי בכל אלה נטמאו הגוים אשר אני משלח מפניכם
Lev 18:25 כה ותטמא הארץ ואפקד עונה עליה ותקא הארץ את ישביה
Lev 18:26 כו ושמרתם אתם את חקתי ואת משפטי ולא תעשו מכל התועבת האלה  האזרח והגר הגר בתוככם
Lev 18:27 כז כי את כל התועבת האל עשו אנשי הארץ אשר לפניכם ותטמא הארץ
Lev 18:28 כח ולא תקיא הארץ אתכם בטמאכם אתה כאשר קאה את הגוי אשר לפניכם
Lev 18:29 כט כי כל אשר יעשה מכל התועבת האלה--ונכרתו הנפשות העשת מקרב עמם
Lev 18:30 ל ושמרתם את משמרתי לבלתי עשות מחקות התועבת אשר נעשו לפניכם ולא תטמאו בהם  אני יהוה אלהיכם  {פ}